മനാമ: ഇന്ത്യൻ സ്കൂൾ ബഹ്‌റൈൻ ഭരണസമിതി ഇല്ലാത്ത നേട്ടങ്ങൾ പെരുപ്പിച്ചു കാട്ടി രക്ഷിതാക്കളെ വീണ്ടും വിഡ്ഢികളാക്കുകയാണെന്ന് യുണൈറ്റഡ് പേരന്റ്സ് പാനൽ (യു.പി.പി) ഭാരവാഹികൾ വാർത്താസമ്മേളനത്തിൽ ആരോപിച്ചു. പുതിയ ഭരണഘടന അനുസരിച്ച് ഡിസംബർ ആദ്യവാരം തിരഞ്ഞെടുപ്പ് നടത്തുമെന്ന ഭരണസമിതിയുടെ പ്രഖ്യാപനം ഗുരുതരമായ ജനാധിപത്യ ലംഘനവും നടപടിക്രമങ്ങളോടുള്ള വെല്ലുവിളിയുമാണെന്ന് അവർ വ്യക്തമാക്കി. ഡിസംബർ ആദ്യവാരം പുതിയ ഭരണഘടന അനുസരിച്ച് തിരഞ്ഞെടുപ്പ് നടത്തുമെന്ന ഭരണസമിതിയുടെ പ്രഖ്യാപനം ഗുരുതരമായ ജനാധിപത്യ ലംഘനവും നടപടിക്രമങ്ങളോടുള്ള വെല്ലുവിളിയുമാണെന്ന് നേതാക്കൾ കുറ്റപ്പെടുത്തി.
ജനറൽ ബോഡിയിലെ ആശയക്കുഴപ്പവും തർക്കങ്ങളും
മന്ത്രാലയത്തിന്റെ നിർദ്ദേശപ്രകാരം സി.ആർ (CR) എടുക്കാനുള്ള തീരുമാനം ജനറൽ ബോഡി ഏകകണ്ഠേന അംഗീകരിച്ചിരുന്നുവെങ്കിലും, അജണ്ടയിൽ ഉൾപ്പെടുത്തിയ ഭരണഘടനാ ഭേദഗതി ചർച്ച ചെയ്യുന്നതിനിടയിൽ രക്ഷിതാക്കളുടെ ശക്തമായ എതിർപ്പുണ്ടായി. തുടർന്ന് ഭേദഗതി അംഗീകരിക്കാൻ കഴിയാതെ വന്നതോടെ ചെയർമാൻ യോഗത്തിൽ നിന്ന് ക്ഷുഭിതനായി ഇറങ്ങിപ്പോവുകയായിരുന്നു. രഹസ്യ വോട്ടെടുപ്പിലൂടെ രക്ഷിതാക്കളുടെ അഭിപ്രായം തേടാൻ അവസരം നൽകാതെ, യോഗം തീരുമാനങ്ങൾ ഇല്ലാതെ പിരിഞ്ഞതിന് ശേഷം ഭരണഘടന ഭേദഗതി അംഗീകരിച്ചതായി കാണിച്ച് രക്ഷിതാക്കൾക്ക് സർക്കുലർ അയച്ചത് തികഞ്ഞ വഞ്ചനയാണെന്ന് യു.പി.പി ആരോപിച്ചു.
പന്ത്രണ്ട് വർഷത്തെ ‘വികസന നേട്ടങ്ങൾ’ പൊള്ളയെന്ന് വിമർശനം
കഴിഞ്ഞ 12 വർഷമായി സ്കൂൾ ഭരിക്കുന്നവർ അവകാശപ്പെടുന്ന വികസന നേട്ടങ്ങൾ യാഥാർത്ഥ്യബോധമില്ലാത്തതാണെന്ന് നേതാക്കൾ ചൂണ്ടിക്കാട്ടി. ക്ലാസ് മുറികളിൽ ടെലിവിഷൻ മോണിറ്ററുകൾ സ്ഥാപിച്ച് അവയെ ‘സ്മാർട്ട് ക്ലാസ്’ എന്ന് വിശേഷിപ്പിക്കുന്നത് വിഡ്ഢിത്തമാണ്. ഡിജിറ്റൽ പഠനസാമഗ്രികൾ ഉപയോഗിക്കാൻ അധ്യാപകർക്ക് പരിശീലനം നൽകാത്തതിനാൽ കുട്ടികൾക്ക് അതുകൊണ്ട് യാതൊരു പ്രയോജനവുമില്ല. ഇതിന്റെ പേരിൽ കുട്ടികളിൽ നിന്ന് മാസംതോറും ഫീസ് ഈടാക്കി ലക്ഷക്കണക്കിന് ദിനാറുകളാണ് സ്കൂൾ സമാഹരിക്കുന്നത്.
സമ്പത്തിക പ്രതിസന്ധിയും ശമ്പള കുടിശ്ശികയും
റിഫാ കാമ്പസിന്റെ ലോൺ അടച്ചുതീർന്നിട്ടും, ഇൻഫ്രാസ്ട്രക്ചർ ഫീ ഇനത്തിൽ ആയിരക്കണക്കിന് കുട്ടികളിൽ നിന്ന് പ്രതിമാസം വലിയ തുക പിരിച്ചെടുത്തിട്ടും അധ്യാപകർക്കും ജീവനക്കാർക്കും കൃത്യസമയത്ത് ശമ്പളം നൽകാൻ കഴിയാത്തത് ഭരണസമിതിയുടെ കഴിവുകേടാണ് വ്യക്തമാക്കുന്നത്. സുതാര്യമല്ലാത്ത പാഴ്‌ചിലവുകളും സാമ്പത്തിക അച്ചടക്കമില്ലായ്മയുമാണ് ഇതിന് കാരണം. തിരഞ്ഞെടുപ്പുകളിൽ വോട്ട് ഉറപ്പാക്കാൻ ചില രക്ഷിതാക്കളുടെ ഫീസ് കുടിശ്ശിക എഴുതിത്തള്ളുന്ന മോശം പ്രവണതയാണ് നിലവിലെ ഭരണസമിതി തുടരുന്നതെന്നും ഇത് അവസാനിപ്പിക്കണമെന്നും യു.പി.പി ആവശ്യപ്പെട്ടു.
അക്കാദമിക് രംഗത്ത് മുൻനിരയിലുണ്ടായിരുന്ന ഇന്ത്യൻ സ്കൂൾ ഇന്ന് മറ്റ് സ്കൂളുകൾക്ക് പിന്നിലായിരിക്കുകയാണ്. യു.പി.പി അധികാരത്തിൽ വന്നാൽ ഇത്തരം കബളിപ്പിക്കൽ ഫീസുകളുടെ പിരിവുകൾ അവസാനിപ്പിക്കുമെന്നും, നേരായ മാർഗ്ഗത്തിലൂടെ തിരഞ്ഞെടുപ്പ് നടത്തി സ്കൂളിന്റെ ദുരവസ്ഥ മാറ്റിയെടുക്കാൻ രക്ഷിതാക്കൾ മുന്നോട്ടුවരണമെന്നും ഭാരവാഹികൾ അഭ്യർത്ഥിച്ചു. ഡോ. സുരേഷ് സുബ്രഹ്മണ്യം, ഹിളർ വലിയകത്ത്, എഫ്.എം. ഫൈസൽ, ചന്ദ്രബോസ്, സുനീഷ് സുശീലൻ, റഫീക്ക് അബ്ദുള്ള, അബ്ബാസ് സേഠ്, ഫിലിപ്പ് കറുകച്ചാൽ, ഷിബിൻ തോമസ്, ദേവദാസ് നായർ എന്നിവർ പത്രസമ്മേളനത്തിൽ പങ്കെടുത്തു.
