മനാമ: ബഹ്റൈൻ പ്രവാസി മലയാളി സമൂഹത്തിന് ആഘോഷത്തിന്റെ വസന്തമൊരുക്കിക്കൊണ്ട് ബഹ്റൈൻ കേരളീയ സമാജത്തിന്റെ (BKS) ‘ശ്രാവണം 2026’ ഓണാഘോഷങ്ങൾ സമാജം ഓഡിറ്റോറിയത്തിൽ ആവേശകരമായി തുടരുന്നു. ജൂലൈ 31-ന് തുടക്കമിട്ട ആഘോഷ പരമ്പരയിൽ ഓഗസ്റ്റ് മാസത്തിൽ സംഘടിപ്പിച്ച പിള്ളേരോണം, കബഡി, പഞ്ചഗുസ്തി, എസ്.പി.ബി-ജാനകി സംഗീതസന്ധ്യ, തിരുവോണാരവം, സിത്താർ നൈറ്റ് എന്നിവ വൻ ജനശ്രദ്ധ നേടിയിരുന്നു.
തുടർന്ന് വരുന്ന സെപ്റ്റംബർ മാസത്തിലും സംഗീതം, നൃത്തം, പാരമ്പര്യ കലകൾ, മത്സരങ്ങൾ, സിനിമ, ഭക്ഷണസംസ്കാരം എന്നിവ കോർത്തിണക്കിയ വിപുലമായ പരിപാടികളാണ് അണിയറയിൽ ഒരുങ്ങുന്നത്:
-
സെപ്റ്റംബർ 4 (വൈകിട്ട് 4.00): കാസർഗോഡ് മുതൽ തിരുവനന്തപുരം വരെയുള്ള വിഭവങ്ങളുമായി ‘രുചിമേള’, ഗായിക അഞ്ചു ജോസഫിന്റെ ഗാനമേള, രാജ് കലേഷിന്റെ കലാസന്ധ്യ.
-
സെപ്റ്റംബർ 5: ഫ്ലാഷ് മോബ് മത്സരം.
-
സെപ്റ്റംബർ 10 (വൈകിട്ട് 7.30): കുമാരി ഗംഗാ ശശിധരന്റെ വയലിൻ കച്ചേരി.
-
സെപ്റ്റംബർ 11: നൂറിലധികം വനിതകൾ അണിനിരക്കുന്ന മെഗാ തിരുവാതിര.
-
സെപ്റ്റംബർ 12 & 13: പായസ മത്സരം, ഓണപ്പുടവ മത്സരം, ഓണപ്പാട്ട് മത്സരം.
-
സെപ്റ്റംബർ 16: ‘ആരവം മാരം’ നാടൻപാട്ട് സന്ധ്യ.
-
സെപ്റ്റംബർ 17 (വൈകിട്ട് 7.30): ദേശീയ പുരസ്കാര ജേതാവ് വൈക്കം വിജയലക്ഷ്മിയുടെ ഗാനമേള.
-
സെപ്റ്റംബർ 18 (വൈകിട്ട് 7.00): മാസ്റ്റർ നീൽഗ്രീവ് അവതരിപ്പിക്കുന്ന ‘വീണാ റിവീരാ’ സംഗീതപരിപാടിയും മെഗാ ചരടുപിന്നിക്കളിയും.
-
സെപ്റ്റംബർ 22: മലയാള സിനിമാ ക്വിസ്.
-
സെപ്റ്റംബർ 24 (വൈകിട്ട് 7.30): സ്റ്റാർ സിംഗർ താരങ്ങളായ മെറിൻ ഗ്രിഗറി, ദിഷാ പ്രകാശ്, ഗോകുൽ എന്നിവരുടെ മ്യൂസിക്കൽ നൈറ്റ്.
-
സെപ്റ്റംബർ 25 (വൈകിട്ട് 6.30): വാനമ്പാടി കെ.എസ്. ചിത്ര നയിക്കുന്ന ‘ചിത്രാഞ്ജലി’ സംഗീതനിശ. (രാവിലെ 10 മണിക്ക് പൂക്കളമത്സരം).
-
സെപ്റ്റംബർ 26 & 27: തിരുവാതിര മത്സരം, സിനിമാറ്റിക് ഡാൻസ് മത്സരം.
ആഘോഷങ്ങളുടെ സമാപനത്തോടനുബന്ധിച്ച് ഒക്ടോബർ 2-ന് പ്രശസ്ത പാചകവിദഗ്ധൻ പഴയിടം മോഹനൻ നമ്പൂതിരിയുടെ നേതൃത്വത്തിൽ സമൃദ്ധമായ ഓണസദ്യയും ഒരുക്കും. എല്ലാ പരിപാടികളിലേക്കും പ്രവേശനം സൗജന്യമായിരിക്കുമെന്നും പ്രവാസി കുടുംബങ്ങളെ ഹൃദയപൂർവ്വം സ്വാഗതം ചെയ്യുന്നതായും സമാജം പ്രസിഡന്റ് പി.വി. രാധാകൃഷ്ണപിള്ള, ജനറൽ സെക്രട്ടറി വർഗീസ് കാരക്കൽ, ജനറൽ കൺവീനർ ഹരികൃഷ്ണൻ ബി. നായർ എന്നിവർ അറിയിച്ചു.
