മനാമ: ഇന്ത്യൻ സ്‌കൂൾ ഇസ ടൗൺ കാമ്പസിൽ നിഷ്ക 2026 വളരെ ആവേശത്തോടെയും ഉത്സാഹഭരിതമായ പങ്കാളിത്തത്തോടെയും ആഘോഷിച്ചു. കൊമേഴ്‌സ്, ഹ്യുമാനിറ്റീസ് വിഭാഗങ്ങളിലെ വിദ്യാർത്ഥികളുടെ സർഗ്ഗാത്മകത മാറ്റുരക്കുന്നതായിരുന്നു ഈ വാർഷിക ഉത്സവം. ഈ വകുപ്പുകൾ സംയുക്തമായി ക്ലാസ് മുറിക്ക് പുറത്ത് വിദ്യാർത്ഥികളുടെ കഴിവുകൾ പര്യവേക്ഷണം ചെയ്യാനും സൃഷ്ടിപരവും സഹകരണപരവുമായ സാഹചര്യങ്ങളിൽ അവരുടെ അറിവും കഴിവുകളും പ്രയോഗിക്കാനുമുള്ള ഒരു വേദി ഒരുക്കുക എന്ന ലക്ഷ്യത്തോടെയാണ് പരിപാടി നടത്തിയത്.
പ്രിൻസിപ്പൽ ശാന്തകുമാർ ദസരി ദീപം തെളിയിച്ചു. മിഡിൽ സെക്ഷൻ വൈസ് പ്രിൻസിപ്പലും കൊമേഴ്‌സ് വിഭാഗം മേധാവിയുമായ ബിജു വാസുദേവൻ, അക്കാദമിക അഡ്മിനിസ്ട്രേഷൻ വിഭാഗം വൈസ് പ്രിൻസിപ്പലും ഹ്യുമാനിറ്റീസ് വിഭാഗം മേധാവിയുമായ രാജേഷ് നായർ, സീനിയർ വിഭാഗം വൈസ് പ്രിൻസിപ്പൽ റെജി വറുഗീസ്, പ്രധാന അധ്യാപിക ആൻലി ജോസഫ്, ആക്ടിവിറ്റി പ്രധാന അധ്യാപിക ശ്രീകല ആർ, സ്റ്റാഫ് പ്രതിനിധി പാർവതി ദേവദാസ്, ഫാക്കൽറ്റി അംഗങ്ങൾ എന്നിവർ ചടങ്ങിൽ പങ്കെടുത്തു. ടാൻസിയ എൽസ സോണി സ്വാഗവും ഇഷാൻ മിസ്ട്രി നന്ദി പറഞ്ഞു.
സാലഡ് നിർമ്മാണ മത്സരത്തിൽ പതിനൊന്നാം ക്ലാസിലെ മറിയം മുഹമ്മദ് അർഫാത്ത് കിർകിരെ ഒന്നാം സ്ഥാനവും പന്ത്രണ്ടാം ക്ലാസിലെ ഫെദ സിദ്ദിഖുൽ രണ്ടാം സ്ഥാനവും നേടി. പതിനൊന്നാം ക്ലാസിലെ സഫൂറ ഷബ്ബീർ ഖുറേഷിയും പന്ത്രണ്ടാം ക്ലാസിലെ ഇന്നോ ക്രിസ്റ്റീനയും സംയുക്തമായി മൂന്നാം സ്ഥാനവും നേടി.
ലോഗോ ഡിസൈനിംഗ് മത്സരം വിദ്യാർത്ഥികൾക്ക് ദൃശ്യ ആശയവിനിമയത്തിലൂടെയും രൂപകൽപ്പനയിലൂടെയും അവരുടെ ആശയങ്ങൾ പ്രകടിപ്പിക്കാനുള്ള അവസരം നൽകി. പന്ത്രണ്ടാം ക്ലാസിലെ ദീപാൻഷു നായക് ഒന്നാം സ്ഥാനം നേടി. പന്ത്രണ്ടാം ക്ലാസിലെ ജിൽസ് ജെയ്‌മോൻ രണ്ടാം സ്ഥാനം നേടി. പന്ത്രണ്ടാം ക്ലാസിലെ അനഘ പരിയാരത്തും ലക്ഷ്മി വിനയും മൂന്നാം സ്ഥാനം നേടി.
അഡ്വഞ്ചർ ഇവന്റ് പങ്കാളികളുടെ ടീം വർക്ക്, ഏകോപനം, പ്രശ്നപരിഹാര കഴിവുകൾ എന്നിവ പരീക്ഷിച്ചു. പന്ത്രണ്ടാം ക്ലാസ് എഫ് വിജയിയായി, പന്ത്രണ്ടാം ക്ലാസ് ഇ രണ്ടാം സ്ഥാനവും പന്ത്രണ്ടാം ക്ലാസ് എ മൂന്നാം സ്ഥാനവും നേടി.
പേപ്പർ പ്രസന്റേഷൻ മത്സരത്തിൽ വിദ്യാർത്ഥികൾ അവരുടെ ഗവേഷണം, വിശകലന ചിന്ത, ആശയവിനിമയ കഴിവുകൾ എന്നിവ പ്രദർശിപ്പിച്ചു. പന്ത്രണ്ടാം ക്ലാസിലെ ഇവാന റേച്ചൽ ബിനു ഒന്നാം സമ്മാനവും പന്ത്രണ്ടാം ക്ലാസിലെ മുഹമ്മദ് റെഹാൻ രണ്ടാം സമ്മാനവും പന്ത്രണ്ടാം ക്ലാസിലെ നൻമ എൽസ തോമസ് മൂന്നാം സമ്മാനവും നേടി.
ഡിജിറ്റൽ ഡിസ്പ്ലേ ബോർഡ് മത്സരം വിദ്യാർത്ഥികളുടെ സർഗ്ഗാത്മകതയും സഹകരണവും തെളിയിച്ചു. പതിനൊന്നാം ക്ലാസ് വിഭാഗത്തിൽ , ക്ലാസ് അധ്യാപിക സിന്ധു ആനി മാത്യുവിന്റെ നേതൃത്വത്തിൽ എസ്. റിതീഷും സംഘവും നയിച്ച XI F ഒന്നാം സ്ഥാനം നേടി. ക്ലാസ് അധ്യാപിക രജിത എബ്രഹാമിന്റെ കീഴിൽ ശ്വേത ജോയ്‌സ് ജോർജിന്റെയും സംഘത്തിന്റെയും നേതൃത്വത്തിൽ XI G രണ്ടാം സ്ഥാനം നേടി. റോൺ ബേബി റോയിയുടെയും സംഘത്തിന്റെയും നേതൃത്വത്തിൽ XI C ക്ലാസ് അധ്യാപിക ഗീത സുരേഷ്കുമാറിന്റെ കീഴിൽ മൂന്നാം സ്ഥാനം നേടി.
പന്ത്രണ്ടാം ക്ലാസ് വിഭാഗത്തിൽ, ക്ലാസ് ടീച്ചർ ദീപ മാത്യുവിന്റെ നേതൃത്വത്തിൽ ജെർമിയ ജെയ്‌സൺ ജോയി നയിച്ച XII സി ഒന്നാം സ്ഥാനം നേടി. ക്ലാസ് ടീച്ചർ ഫാത്തിമ ഫയാസിന്റെ നേതൃത്വത്തിൽ മെർട്ട് അലി യാറ്റ്കിനും ടീമും നയിച്ച XII എ രണ്ടാം സ്ഥാനം നേടി. ക്ലാസ് ടീച്ചർ ബിജോ തോമസിന്റെ മേൽനോട്ടത്തിൽ അനഘ പരിയാരത്തും ടീമും നയിച്ച XII എഫ് മൂന്നാം സ്ഥാനം നേടി.
സ്‌കൂൾ ചെയർമാൻ അഡ്വ. ബിനു മണ്ണിൽ വറുഗീസ്, സെക്രട്ടറി വി. രാജപാണ്ഡ്യൻ, അസി. സെക്രട്ടറിയും അക്കാദമിക് അംഗവുമായ രഞ്ജിനി മോഹൻ, പ്രിൻസിപ്പൽ ശാന്തകുമാർ ദസരി എന്നിവർ ജേതാക്കളെ അഭിനന്ദിച്ചു.
