മനാമ: ജോലിക്കിടെ വീണ് പരിക്കേറ്റ് കിടപ്പിലായ തിരുവല്ല ഓതറ സ്വദേശി രഘുവിന് ബഹ്റൈൻ പത്തനംതിട്ട ജില്ല അസോസിയേഷൻ തുടർചികിത്സക്കുള്ള പണം കൈമാറി. അസോസിയേഷൻ ഭാരവാഹികളായ വിഷ്ണു, ആശിഷ് കോന്നി, അബിൻ തെക്കേമല, ജയഘോഷ് എന്നിവർ നാട്ടിലേക്ക് പോകുന്ന രഘുവിനെ സന്ദർശിച്ച് പണം നൽകുകയായിരുന്നു. കഴിഞ്ഞ ദിവസം പോയ ബഹ്റൈൻ -തിരുവനന്തപുരം വിമാനത്തിലാണ് രഘു നാടണഞ്ഞത്.
ബി.കെ.എസ്.എഫ് പ്രവർത്തകരുടെ നിരന്തര പരിശ്രമത്തിനൊടുവിലാണ് ഇദ്ദേഹത്തിന് നാട്ടിലെത്താൻ അവസരം ഒരുങ്ങിയത്. തിരുവല്ല ഈസ്റ്റ് ഓതറ സ്വദേശിയായ രഘു 20 വർഷത്തോളമായി ബഹ്റൈൻ പ്രവാസിയായിരുന്നു. മൂന്നുമാസം മുമ്പുണ്ടായ അപകടമാണ് അദ്ദേഹത്തിൻ്റെ ജീവിതത്തിൻ്റെ താളം തെറ്റിച്ചത്. ജോലിക്കിടെ കെട്ടിടത്തിൽനിന്ന് വീണ് കിടപ്പിലായ രഘുവിൻ്റെ ജീവിതം പിന്നീട് ദുരിതനാളുകളിലൂടെയായിരുന്നു. എല്ലാ കാര്യങ്ങൾക്കും പരസഹായം വേണ്ട രഘുവിന് തുണയായി ഉണ്ടായിരുന്നത് ഉറ്റ സുഹൃത്തായ മാത്യുവാണ്. രഘുവിൻ്റെ ദൈന്യതയറിഞ്ഞെത്തിയ ബി.കെ.എസ്.എഫ് പ്രവർത്തകർ തുടർന്ന് വേണ്ട സഹായങ്ങൾ നൽകി. ഇദ്ദേഹത്തിൻ്റെ യാത്രക്ക് വേണ്ട ഒരുക്കങ്ങളും നടത്തി. പ്രവാസി കമീഷൻ അംഗം സുബൈർ കണ്ണൂർ, ബി.കെ.എസ്.എഫ് രക്ഷാധികാരി ബഷീർ അമ്പലായി, കൺവീനർ ഹാരിസ് പഴയങ്ങാടി, അമൽ ദേവ് എന്നിവരുടെ നേതൃത്വത്തിലായിരുന്നു പ്രവർത്തനങ്ങൾ. മലയാളി ബിസിനസ് ഫോറം യൂത്ത് വിങ് ഭാരവാഹികളാണ് നാട്ടിലേക്കുള്ള വിമാന ടിക്കറ്റ് എടുത്തു നൽകിയത്.