മനാമ: ഇന്ത്യൻ വിദേശകാര്യ മന്ത്രി എസ്. ജയശങ്കർ രണ്ട് ദിവസത്തെ സന്ദർശനത്തിനായി ബഹ്റൈനിലെത്തി. ബഹ്റൈൻ വിദേശകാര്യ മന്ത്രാലയം അണ്ടർ സെക്രട്ടറി ഡോ. ശൈഖ് അബ്ദുല്ല ബിൻ അഹ്മദ് അൽ ഖലീഫ മന്ത്രിയെയും സംഘത്തെയും സ്വീകരിച്ചു.
ത്രിരാഷ്ട്ര സന്ദർശനത്തിൻ്റെ ഭാഗമായാണ് വിദേശകാര്യ മന്ത്രി ബഹ്റൈനിൽ എത്തിയത്. ബഹ്റൈന് പുറമേ, യു.എ.ഇ, സീഷെൽസ് എന്നീ രാജ്യങ്ങളും അദ്ദേഹം സന്ദർശിക്കുന്നുണ്ട്. വിദേശകാര്യ മന്ത്രിയായി ചുമതലയേറ്റശേഷമുള്ള അദ്ദേഹത്തിൻ്റെ ആദ്യ ബഹ്റൈൻ സന്ദർശനമാണ് ഇത്. ഏറെക്കാലമായി ബഹ്‌റൈനുമായി അടുത്ത സൗഹൃദം സൂക്ഷിക്കുന്ന രാജ്യങ്ങളിലൊന്നാണ് ഇന്ത്യ. വിദേശകാര്യ മന്ത്രിയുടെ സന്ദര്‍ശനം ഇന്ത്യ-ബഹ്റൈന് നയതന്ത്ര ബന്ധം ശക്തമാക്കുമെന്നാണ് പ്രതീക്ഷിക്കുന്നത്.
പ്രധാനമന്ത്രി പ്രിൻസ് ഖലീഫ ബിൻ സൽമാൻ അൽ ഖലീഫയുടെ വിയോഗത്തിൽ ഇന്ത്യൻ സർക്കാരിൻ്റെയും ജനങ്ങളുടെയും അനുശോചനം അദ്ദേഹം ബഹ്റൈൻ സർക്കാരിനെ അറിയിക്കും. ഉഭയകക്ഷി വിഷയങ്ങളും ചർച്ച ചെയ്യും. ബുധനാഴ്ച അദ്ദേഹം യു.എ.ഇയിലേക്ക് പോകും. 27,28 തീയതികളിലാണ് സീഷെൽസ് സന്ദർശനം.
