മനാമ: ബഹ്റൈന്‍ ദേശീയ ദിനാഘോഷത്തെ വരവേൽക്കാനൊരുങ്ങി ക്യാപ്പിറ്റൽ ഗവർണറേറ്റ്. ദേശീയ ദിനത്തോടനുബന്ധിച്ച് വിവിധ ആഘോഷ പരിപാടികള്‍ സംഘടിപ്പിക്കുമെന്ന് കാപിറ്റല്‍ ഗവര്‍ണര്‍ ശൈഖ് ഹിഷാം ബിന്‍ അബ്ദുറഹ്മാന്‍ ആല്‍ ഖലീഫ പറഞ്ഞു. ബഹ്‌റൈൻ്റെ സാംസ്കാരിക പൈതൃക പാരമ്പര്യങ്ങളിലൂന്നി വിവിധ കലാ- കായിക പരിപാടികളാണ് സംഘടിപ്പിക്കുക. കഴിഞ്ഞ വര്‍ഷങ്ങളില്‍ ദേശീയ ദിനത്തോടനുബന്ധിച്ച് ശ്രദ്ധേമായ ഒട്ടേറെ പരിപാടികള്‍ കാപിറ്റല്‍ ഗവര്‍ണറേറ്റ് സംഘടിപ്പിക്കുകയും പൊതുജനങ്ങളുടെ ശ്രദ്ധനേടുകയും ചെയ്തിരുന്നു.
ദേശസ്നേഹം പ്രകടിപ്പിക്കാനും ഭരണാധികാരികളോടുള്ള കൂറ് വിളംബരം ചെയ്യാനുമുതകുന്ന പരിപാടികളാണ് സംഘടിപ്പിക്കുക. കോവിഡ് പ്രതിരോധ മുൻകരുതലുകൾ പാലിച്ചുകൊണ്ട് തന്നെ വിവിധ സര്‍ക്കാര്‍ അതോറിറ്റികളും മന്ത്രാലയങ്ങളും വ്യാപാര സ്ഥാപനങ്ങളുമായി സഹകരിച്ച് പരിപാടി വിജയിപ്പിക്കുന്നതിനുള്ള പദ്ധതികള്‍ തയാറാക്കിയിട്ടുണ്ട്.
ഡിസംബര്‍ 14ന് സീഫ് മാളില്‍ തടിയില്‍ തീര്‍ത്ത ശില്‍പങ്ങളുടെ പ്രദര്‍ശനം, 18ന് ദക്ഷിണ മേഖല ഗവര്‍ണറേറ്റുമായി ചേര്‍ന്ന് സൈക്കിള്‍ പരേഡ്, 27ന് ‘മനാമയുടെ ചരിത്ര ചിത്രങ്ങള്‍’ പുസ്തകത്തിൻ്റെ രണ്ടാം പതിപ്പിൻ്റെ പ്രകാശനം എന്നിവയാണ് പ്രധാന പരിപാടികൾ. ഏറ്റവും മനോഹരമായി അലങ്കരിക്കുന്ന കെട്ടിടങ്ങള്‍ക്ക് സമ്മാനവും നല്‍കുന്നുണ്ട്. കഴിഞ്ഞ വര്‍ഷങ്ങളിലും ഈ മത്സരം നടന്നിരുന്നു. ഒപ്പം തന്നെ രണ്ട് പുതിയ ദേശീയ ഉദ്ഗ്രഥന ഗാനങ്ങളും പുറത്തിറക്കുന്നുണ്ട്.
ഇൻസ്റ്റഗ്രാമിലൂടെയാണ് ഓണ്‍ലൈന്‍ മത്സരങ്ങള്‍ സംഘടിപ്പിക്കുക. മൂന്ന് ഓണ്‍ലൈന്‍ മത്സരങ്ങളാണ് സംഘടിപ്പിക്കുന്നത്. ‘ദേശീയ ദിനം നമ്മെ ഒന്നിപ്പിക്കുന്നു’ പ്രമേയത്തിലുള്ള ചിത്രരചന മത്സരവും ഇതിൻ്റെ ഭാഗമായി ഒരുക്കുന്നുണ്ടെന്ന് അദ്ദേഹം കൂട്ടിച്ചേര്‍ത്തു.
