മനാമ: ബഹ്റൈനിലെ ലുലു ഹൈപ്പർ മാർക്കറ്റുകളിൽ ‘ലെറ്റ്സ് ഈറ്റാലിയൻ’ ഭക്ഷ്യമേളയുടെ നാലാം പതിപ്പിന് തുടക്കമായി. ഡാന മാൾ ലുലു ഹൈപ്പർമാർക്കറ്റിൽ ബഹ്റൈനിലെ ഇറ്റാലിയൻ അംബാസഡർ പൗള അമാദേ ഭക്ഷ്യമേള ഉദ്ഘാടനം ചെയ്തു. ലുലു ഗ്രൂപ് ഡയറക്ടർ ജുസെർ രൂപവാല, ഇറ്റാലിയൻ എംബസിയിലെ മുതിർന്ന ഉദ്യോഗസ്ഥർ, ലുലു ഹൈപ്പർമാർക്കറ്റ് മാനേജ്മെൻറ് പ്രതിനിധികൾ എന്നിവരും ചടങ്ങിൽ പങ്കാളികളായി. ഏപ്രിൽ 19 മുതൽ 25വരെ തുടരുന്ന ഭക്ഷ്യമേള ഇറ്റാലിയൻ ട്രേഡ് ഏജൻസിയുടെ സഹകരണത്തോടെയാണ് സംഘടിപ്പിക്കുന്നത്.
ലുലു ഹൈപ്പർമാർക്കറ്റുമായുള്ള സഹകരണം മികവുറ്റതാണെന്നും ഇറ്റാലിയൻ രുചിഭേദങ്ങൾ ആസ്വദിക്കാനുള്ള ഈ അവസരം ഒരുക്കിയതിന് നന്ദി അറിയിക്കുന്നതായും അംബാസഡർ പറഞ്ഞു. ബഹ്റൈനിലെ ഉപഭോക്താക്കൾക്കായി ഇറ്റാലിയൻ വിഭവങ്ങൾ അവതരിപ്പിക്കുന്നതിൽ സന്തോഷമുണ്ടെന്ന് ജുസെർ രൂപവാല പറഞ്ഞു. പ്ര മുഖ ഇറ്റാലിയൻ ബ്രാൻഡുകളുടെ ചീസ്, ചോക്ലറ്റ്, ഫ്രൂട്ട് ജാമുകൾ, പാസ്ട്രി, ഒലിവ് ഓയിൽ തുടങ്ങിയവ ഭക്ഷ്യമേളയിലെ ആകർഷണങ്ങളാണ്. പ്രാദേശിക ഉപഭോക്താക്കളെ ഇറ്റാലിയൻ ഭക്ഷണങ്ങളിലേക്ക് ആകർഷിക്കാൻ ഭക്ഷ്യമേള സഹായിക്കുമെന്ന് ഇറ്റാലിയൻ ട്രേഡ് ഏജൻസി കമീഷണർ ജിയോസഫാത് റിഗാനോ പറഞ്ഞു.