മനാമ: കോവിഡ് മുൻകരുതൽ നിയന്ത്രണങ്ങൾ ലംഘിച്ച് സേവനം നൽകിയ ബാർബർ ഷോപ്പ് അധികൃതർ അടച്ചുപൂട്ടി. കാപിറ്റൽ ഗവർണറേറ്റ് പരിധിയിലെ ഒരു ഹോട്ടലിലെ താമസക്കാർക്ക് സേവനം നൽകിയ ബാർബർ ഷോപ്പിനെതിരെയാണ് നടപടി. വാണിജ്യ, വ്യവസായ, വിനോദ സഞ്ചാര മന്ത്രാലയത്തിന് കീഴിലെ പരിശോധന വിഭാഗമാണ് നിയമലംഘനം കണ്ടെത്തിയത്.
നിയമം ലംഘിച്ച് സേവനം നൽകുന്നുവെന്ന വിവരം ലഭിച്ചതിനെത്തുടർന്നാണ് അധികൃതർ പരിശോധന നടത്തിയത്. ബാർബർ ഷോപ്പിൽ ആളുകൾക്ക് സേവനം നൽകുന്നത് അധികൃതർക്ക് കാണാൻ കഴിഞ്ഞു. തുടർന്ന് കേസ് രജിസ്റ്റർ ചെയ്ത അധികൃതർ തുടർ നടപടികൾക്കായി പബ്ലിക് പ്രോസിക്യൂഷന് കൈമാറി. കോവിഡ് മുൻകരുതൽ നിർദേശങ്ങൾ കർശനമായി പാലിക്കാൻ അധികൃതർ കമ്പനികളോടും സ്ഥാപനങ്ങളോടും ആവശ്യപ്പെട്ടു. ബഹ്റൈനിൽ കോവിഡ് കേസുകൾ ഉയർന്നതിനെത്തുടർന്ന് ഏർപ്പെടുത്തിയ ഭാഗിക അടച്ചിടൽ ഉൾപ്പെടെയുള്ള നിയന്ത്രണങ്ങൾ ജൂലൈ രണ്ട് വരെ നീട്ടിയിട്ടുണ്ട്. ബാർബർ ഷോപ്പുകളും ഈ കാലയളവിൽ പ്രവർത്തിക്കാൻ പാടില്ല.