മനാമ: അസുഖബാധിതനായി ചികിത്സയിൽ കഴിയുകയായിരുന്ന പ്രവാസി മലയാളി ബഹ്റൈനിൽ അന്തരിച്ചു. തിരുവനന്തപുരം പാറശ്ശാല പാലിയോട് സ്വദേശി ജസ്റ്റിൻ രാജ് (40) ആണ് മരിച്ചത്.
അഞ്ച് വർഷം മുമ്പ് ബഹ്റൈനിലെത്തിയ ജസ്റ്റിൻ ചെറിയ കൺസ്ട്രക്ഷൻ ജോലികൾ ചെയ്തുവരികയായിരുന്നു. കടുത്ത തലവേദനയും വിട്ടുമാറാത്ത പനിയും ബാധിച്ചാണ് ആശുപത്രിയിൽ ചികിത്സ തേടിയത്. വിശദമായ പരിശോധനക്കൊടുവിൽ സൽമാനിയ ഹോസ്പിറ്റലിൽനിന്ന് ജസ്റ്റിന് ടി.ബിയാണന്ന് സ്ഥിരീകരിച്ചു. തുടർന്ന് ഇദ്ദേഹത്തെ ഐസൊലേഷൻ വാർഡിലേക്ക് മാറ്റി. കൂടാതെ രക്തം തലയിൽ കട്ടപിടിച്ചത് മൂലം സർജറിയും ചെയ്യേണ്ടി വന്നു. അതിനുശേഷം വെന്റിലേറ്ററിൽ കഴിയുകയായിരുന്നു.
ഇദ്ദേഹത്തിന്റെ അവസ്ഥ അറിഞ്ഞ് ഹോപ് ബഹ്റൈൻ പ്രവർത്തകരാണ് ചികിത്സക്കും മറ്റും വേണ്ട സഹായങ്ങൾ നൽകി വന്നിരുന്നത്. കഴിഞ്ഞ ദിവസം ഇന്ത്യൻ എംബസി സംഘടിപ്പിച്ച ഓപൺ ഹൗസിൽ ഇദ്ദേഹത്തിന്റെ വിഷയം അവതരിപ്പിച്ചിരുന്നു. ജസ്റ്റിന്റെ ഭാര്യ അജിത നാട്ടിൽനിന്ന് ഇന്ത്യൻ അംബാസഡറുടെ മുമ്പാകെ പ്രയാസങ്ങൾ അവതരിപ്പിക്കുകയും ആവശ്യമായ നടപടി സ്വീകരിക്കാമെന്ന് അംബാസഡർ അറിയിക്കുകയും ചെയ്തിരുന്നു. അതിനിടെയാണ് ആകസ്മികമായി മരണം സംഭവിച്ചത്. മൃതദേഹം നാട്ടിലേക്ക് കൊണ്ടുപോകാൻ നടപടി സ്വീകരിച്ചുവരുന്നു.
പത്താം തരാം വിദ്യാർത്ഥിനിയായ സ്നേഹ, നാലാം ക്ലാസ് വിദ്യാർത്ഥിയായ സ്നേഹിത്ത് എന്നിവർ മക്കളാണ്.