മനാമ: റമദാന്‍ മാസത്തില്‍ എല്ലാ വര്‍ഷവും പ്രതിഭ ഹെല്‍പ് ലൈനിന്റെ നേതൃത്വത്തില്‍ നടത്തിവരാറുള്ള ഒരു മാസം നീണ്ടുനില്‍ക്കുന്ന മാരത്തോണ്‍ രക്തദാന ക്യാമ്പ് പുരോഗമിക്കുന്നു. പ്രതിഭ ഹെല്‍പ് ലൈനിന്റെ നാല് മേഖലകളുമായി കൂടിച്ചേര്‍ന്ന് കിംഗ് ഹമദ് യൂണിവേഴ്‌സിറ്റി ഹോസ്പിറ്റല്‍, സല്‍മാനിയ മെഡിക്കല്‍ എന്നിവിടങ്ങളിലാണ് ക്യാമ്പ് സംഘടിപ്പിക്കുന്നത്.
പ്രതിഭ മനാമ, മുഹറഖ് മേഖലകള്‍ കിംഗ് ഹമദ് ഹോസ്പിറ്റല്‍ കേന്ദ്രീകരിച്ചും പ്രതിഭ റിഫ, സല്‍മാബാദ് മേഖലകള്‍ സല്‍മാനിയ ഹോസ്പിറ്റല്‍ കേന്ദ്രീകരിച്ചുമാണ് വൈകീട്ട് 7 മണിമുതല്‍ ആരംഭിച്ച് രാത്രി 12.30 വരെ നീണ്ടുനില്‍ക്കുന്ന മാരത്തോണ്‍ രക്തദാന ക്യാമ്പ് നടത്തിവരുന്നത്.
മനാമ-മുഹറഖ് മേഖല ക്യാമ്പ് കിംഗ് ഹമദ് ഹോസ്പിറ്റലില്‍ പ്രതിഭ ജനറല്‍ സെക്രട്ടറി മിജോഷ് മൊറാഴയും റിഫ-സല്‍മാബാദ് മേഖല ക്യാമ്പ് സല്‍മാനിയ ഹോസ്പിറ്റലില്‍ പ്രതിഭ കേന്ദ്ര വൈസ് പ്രസിഡന്റ്‌നൗഷാദ് പുനൂരും മാര്‍ച്ച് 2ന് ഉദ്ഘാടനം ചെയ്തു.
പ്രതിഭ അംഗങ്ങളും അഭ്യുദയകാംക്ഷികളും അടക്കം നിരവധി പേര്‍ ദിവസേന ക്യാമ്പുകളില്‍ എത്തിച്ചേരുന്നതായി ഭാരവാഹികള്‍ അറിയിച്ചു. മാര്‍ച്ച് 27 വരെ തുടരുന്ന ക്യാമ്പില്‍ രക്തദാനം നടത്താന്‍ തയ്യാറുള്ള എല്ലാവര്‍ക്കും പങ്കെടുക്കാമെന്ന് പ്രതിഭ ഭാരവാഹികള്‍ അറിയിച്ചു.
