ഇന്ത്യൻ സ്‌കൂൾ പ്രിൻസിപ്പൽ വി.ആർ. പളനിസ്വാമിക്ക് ഇന്ന് യാത്രയയപ്പ്; വിദ്യാഭ്യാസ മേഖലയിൽ നാല് പതിറ്റാണ്ടിന്റെ കർമ്മസാഫല്യം

മനാമ: ബഹ്‌റൈൻ ഇന്ത്യൻ സ്‌കൂളിന്റെ ചരിത്രത്തിൽ ഏറ്റവും കൂടുതൽ കാലം പ്രിൻസിപ്പലായി സേവനമനുഷ്ഠിച്ച വി.ആർ. പളനിസ്വാമിക്ക് വിദ്യാലയം ഔദ്യോഗികമായി യാത്രയയപ്പ് നൽകുന്നു. ജൂൺ 24 ബുധനാഴ്ച (ഇന്ന്) ഇന്ത്യൻ സ്‌കൂൾ ഈസാ ടൗൺ കാമ്പസിലെ ജഷന്മാൾ ഓഡിറ്റോറിയത്തിൽ വെച്ചാണ് ആദരവർപ്പിക്കുന്ന ചടങ്ങുകൾ നടക്കുക. വിദ്യാഭ്യാസ മേഖലയിൽ നാല് പതിറ്റാണ്ടിലേറെ നീണ്ട ഉജ്ജ്വലമായ സേവന പാരമ്പര്യവുമായാണ് അദ്ദേഹം വിദ്യാലയത്തിന്റെ പടിയിറങ്ങുന്നത്.

2001 ജനുവരി ഒന്നിനാണ് വി.ആർ. പളനിസ്വാമി ഇന്ത്യൻ സ്‌കൂളിൽ തന്റെ ഔദ്യോഗിക ജീവിതം ആരംഭിക്കുന്നത്. എട്ട് വർഷം ഗണിതശാസ്ത്ര വകുപ്പ് മേധാവിയായും (HOD) രണ്ട് വർഷം വൈസ് പ്രിൻസിപ്പലായും പ്രവർത്തിച്ച അദ്ദേഹം, തുടർന്ന് നീണ്ട 15 വർഷക്കാലം വിദ്യാലയത്തിന്റെ പ്രിൻസിപ്പലായി മികച്ച ഭരണനേതൃത്വം കാഴ്ചവെച്ചു.

അംഗീകാരങ്ങളുടെ നിറവിൽ: വിദ്യാഭ്യാസ രംഗത്തെ മികച്ച സംഭാവനകൾ പരിഗണിച്ച് 2007-ൽ സി.ബി.എസ്.ഇ ദേശീയ അധ്യാപക അവാർഡും, 2011-ൽ രാജ്യത്തിന്റെ പരമോന്നത അധ്യാപക പുരസ്‌കാരം അന്നത്തെ ഇന്ത്യൻ പ്രസിഡന്റിൽ നിന്നും അദ്ദേഹം ഏറ്റുവാങ്ങിയിട്ടുണ്ട്. ലയൺസ് ക്ലബ് ഓഫ് മദ്രാസ് (1999), വൈസ് മെൻ ഇന്റർനാഷണൽ ക്ലബ് (2000) എന്നിവയും മികച്ച അധ്യാപകനായി അദ്ദേഹത്തെ ആദരിച്ചിരുന്നു. ഗണിതശാസ്ത്രത്തിലും ശാസ്ത്ര വിദ്യാഭ്യാസത്തിലും ബിരുദാനന്തര ബിരുദവും വിദ്യാഭ്യാസത്തിൽ എം.ഫിലും നേടിയ പളനിസ്വാമി മൈസൂരിലെ റീജിയണൽ ഇൻസ്റ്റിറ്റ്യൂട്ട് ഓഫ് എഡ്യൂക്കേഷന്റെ പൂർവ്വ വിദ്യാർത്ഥിയും അമേരിക്കൻ മാത്തമാറ്റിക്കൽ സൊസൈറ്റിയിലെ അംഗവുമാണ്.

ഇന്ത്യൻ സ്കൂളിനെ ഉയരങ്ങളിലെത്തിച്ച അമരക്കാരൻ: സി.ബി.എസ്.ഇ ഉൾപ്പെടെയുള്ള പാഠ്യപദ്ധതികൾക്കായി 1-ാം ക്ലാസ് മുതൽ 12-ാം ക്ലാസ് വരെയുള്ള 17 ഗണിതശാസ്ത്ര പാഠപുസ്തകങ്ങൾ അദ്ദേഹം രചിച്ചിട്ടുണ്ട്. ഇതിൽ അഞ്ചെണ്ണം പ്രശസ്ത പ്രസാധകരായ ഓറിയന്റ് ലോങ്മാൻ ആണ് പുറത്തിറക്കിയത്. ഇന്ത്യൻ സ്കൂളിന് യുനെസ്കോ (UNESCO) അഫിലിയേഷൻ ഉറപ്പാക്കുന്നതിലും, ഭാരത് സ്കൗട്ട്സ് ആൻഡ് ഗൈഡ്സ് ആരംഭിക്കുന്നതിലും അദ്ദേഹം പ്രധാന പങ്കുവഹിച്ചു.

ഗൾഫ് മേഖലയിലുടനീളമുള്ള വിദ്യാഭ്യാസ സമൂഹത്തിന് നേതൃത്വം നൽകിയ അദ്ദേഹം 2021–2022 കാലയളവിൽ സി.ബി.എസ്.ഇ ഗൾഫ് സഹോദയ സെക്രട്ടറിയായും, 2022–2023-ൽ സി.ബി.എസ്.ഇ ഗൾഫ് കൗൺസിൽ ചെയർമാനായും സേവനമനുഷ്ഠിച്ചു. നീറ്റ് (NEET), ജെ.ഇ.ഇ (JEE), സി.യു.ഇ.റ്റി (CUET) തുടങ്ങിയ പ്രമുഖ ദേശീയ പ്രവേശന പരീക്ഷകൾ ബഹ്‌റൈനിൽ സുഗമമായി നടത്തുന്നതിന് അദ്ദേഹം മികച്ച മേൽനോട്ടം വഹിച്ചു. കഴിഞ്ഞ വർഷം (2025) ബഹ്‌റൈൻ വിദ്യാഭ്യാസ-പരിശീലന ഗുണനിലവാര അതോറിറ്റിയുടെ (BQA) പരിശോധനയിൽ ഇന്ത്യൻ സ്‌കൂളിന് പ്രശംസനീയമായ “ഗുഡ്” (Good) റേറ്റിംഗ് ലഭിച്ചതാണ് അദ്ദേഹത്തിന്റെ ഭരണകാലത്തെ ഏറ്റവും തിളക്കമാർന്ന നേട്ടങ്ങളിലൊന്ന്.

തമിഴ്‌നാട്ടിലെ ഈറോഡ് ജില്ലയിലെ ഭാഗവതി നഗർ സ്വദേശിയായ പളനിസ്വാമി 1983 മുതൽ ചെന്നൈയിലാണ് സ്ഥിരതാമസം. ചന്ദ്ര പളനിസ്വാമിയാണ് ഭാര്യ. ഡോ. സന്ദീപ് കുമാർ മകനാണ്.