മനാമ: ഇന്ത്യൻ സ്കൂൾ ബഹ്റൈൻ (ഐഎസ്ബി) ജൂനിയർ കാമ്പസിൽ പരിസ്ഥിതി അവബോധവും പ്രകൃതി സ്നേഹവും പ്രോത്സാഹിപ്പിക്കുന്നതിനായി നിരവധി പ്രവർത്തനങ്ങളിലൂടെ ദേശീയ വൃക്ഷത്തൈ നടീൽ വാരം ആഘോഷിച്ചു. 2035 ഓടെ 3.6 ദശലക്ഷം മരങ്ങൾ നട്ടുപിടിപ്പിക്കാൻ ലക്ഷ്യമിടുന്ന ദേശീയ വനവൽക്കരണ പദ്ധതിയിലൂടെ പരിസ്ഥിതി സുസ്ഥിരതയ്ക്കുള്ള ബഹ്റൈന്റെ പ്രതിബദ്ധതയും 2060 ഓടെ നെറ്റ്-സീറോ കാർബൺ ന്യൂട്രാലിറ്റി കൈവരിക്കുക എന്ന രാജ്യത്തിന്റെ ദർശനവും ഈ സംരംഭം അടിവരയിട്ടു. ഹരിത ഇടങ്ങൾ സംരക്ഷിക്കുന്നതിന്റെയും പ്രകൃതി വിഭവങ്ങൾ സംരക്ഷിക്കുന്നതിന്റെയും സുസ്ഥിര രീതികൾ സ്വീകരിക്കുന്നതിന്റെയും പ്രാധാന്യം ആഘോഷം എടുത്തുകാട്ടി.
സ്കൂൾ വൈസ് ചെയർമാനും എച്ച് എസ് എസ് സി അംഗവുമായ ഡോ. മുഹമ്മദ് ഫൈസൽ, സെക്രട്ടറി വി. രാജപാണ്ഡ്യൻ എന്നിവർ നേതൃത്വം നൽകി. അസി. സെക്രട്ടറിയും അക്കാദമിക അംഗവുമായ രഞ്ജിനി മോഹൻ, പ്രോജക്ടുസ് ആൻഡ് മെയിന്റനൻസ് അംഗം മിഥുൻ മോഹൻ, പ്രിൻസിപ്പൽ ശാന്ത കുമാർ ദസരി, ജൂനിയർ വിംഗ് പ്രിൻസിപ്പൽ പമേല സേവ്യർ, വൈസ് പ്രിൻസിപ്പൽ പ്രിയ ലാജി എന്നിവരും സന്നിഹിതരായിരുന്നു.
ക്യാമ്പസിലെ വിവിധ സ്ഥലങ്ങളിൽ നടന്ന പ്ലാന്റേഷൻ ഡ്രൈവിൽ പ്രധാന അധ്യാപകർ, കോർഡിനേറ്റർമാർ, സ്റ്റാഫ് അംഗങ്ങൾ, പ്രിഫെക്റ്റ് കൗൺസിൽ അംഗങ്ങൾ, വിദ്യാർത്ഥികൾ എന്നിവർ പങ്കുചേർന്നു, പരിസ്ഥിതി സംരക്ഷണത്തിന്റെ പ്രാധാന്യത്തെക്കുറിച്ച് വിദ്യാർത്ഥികളെ ബോധവൽക്കരിക്കുന്നതിനായി ഒരു പ്രത്യേക അസംബ്ലി സംഘടിപ്പിച്ചു. മരങ്ങളുടെ പാരിസ്ഥിതിക നേട്ടങ്ങൾ എടുത്തുകാണിക്കുന്ന ഒരു വിജ്ഞാനപ്രദമായ വീഡിയോ അവതരണം നടന്നു.
ദേശീയ വൃക്ഷ വാരത്തിന്റെ പ്രാധാന്യവും പ്രകൃതിയെ സംരക്ഷിക്കേണ്ടതിന്റെ ആവശ്യകതയും ഊന്നിപ്പറയുന്ന ഒരു പ്രസംഗം ഹെഡ് ഗേൾ യാന ഫെബിഷ് നിർവഹിച്ചു. ജൂനിയർ വിംഗ് നേച്ചർ ക്ലബ് സ്കൂളിലേക്ക് നിരവധി സസ്യങ്ങൾ ഉദാരമായി സംഭാവന നൽകി. പരിസ്ഥിതി ഉത്തരവാദിത്തത്തിന്റെയും സുസ്ഥിര ജീവിതത്തിന്റെയും സന്ദേശം നൽകുന്ന പോസ്റ്ററുകൾ, പ്രസംഗങ്ങൾ, സംഗീത അവതരണം എന്നിവ ആഘോഷങ്ങൾക്ക് നിറം പകർന്നു. സ്കൂൾ ചെയർമാൻ അഡ്വ. ബിനു മണ്ണിൽ വർഗീസ് ഇത്തരം സംരംഭത്തിലൂടെ പരിസ്ഥിതി ഉത്തരവാദിത്തമുള്ള പൗരന്മാരെ വളർത്തിയെടുക്കാനും സുസ്ഥിരമായ ഭാവിയിലേക്ക് സംഭാവന നൽകാൻ യുവതലമുറയെ പ്രചോദിപ്പിക്കാൻ കഴിയുമെന്നും പറഞ്ഞു.
