മനാമ: ആറ് ജി.സി.സി രാജ്യങ്ങളെ തമ്മിൽ ബന്ധിപ്പിക്കുന്ന ചരിത്രപ്രസിദ്ധമായ ജി.സി.സി റെയിൽവേ പദ്ധതി മുന്നോട്ട് കൊണ്ടുപോകുന്നതിനുള്ള സുപ്രധാന കരാറിൽ റിഫ പാലസിൽ വെച്ച് ഒപ്പുവെച്ചു. കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫയുടെ സാന്നിധ്യത്തിലാണ് ഒപ്പുവെക്കൽ ചടങ്ങ് നടന്നത്.
ഗൾഫ് രാജ്യങ്ങൾക്കിടയിലുള്ള അതിർത്തികൾ കടന്നുള്ള യാത്രകളും ചരക്കുനീക്കങ്ങളും കൂടുതൽ സുഗമമാക്കുക, വ്യാപാര തടസ്സങ്ങൾ ഒഴിവാക്കുക, കൂടുതൽ ബിസിനസ്സ്-നിക്ഷേപ അവസരങ്ങൾ തുറന്നുനൽകുക എന്നിവയാണ് പദ്ധതിയുടെ പ്രഥമ ലക്ഷ്യം. ജി.സി.സി രാജ്യങ്ങൾക്കിടയിൽ വ്യാപാര ബന്ധം ദൃഢമാക്കുന്നതിനും വ്യവസായ വളർച്ചയ്ക്കും റെയിൽ ഗതാഗത ശൃംഖല നിർണ്ണായക പങ്ക് വഹിക്കുമെന്ന് പ്രിൻസ് സൽമാൻ ചൂണ്ടിക്കാട്ടി. സംയുക്ത പദ്ധതികൾ വേഗത്തിലാക്കാൻ സാങ്കേതിക വിജ്ഞാനവും സഹകരണവും പങ്കുവെക്കാൻ അദ്ദേഹം അംഗരാജ്യങ്ങളോട് ആഹ്വാനം ചെയ്തു.
46-ാമത് ജി.സി.സി ഉച്ചകോടിയുടെ (ബഹ്‌റൈൻ ഉച്ചകോടി) അധ്യക്ഷ പദവി ബഹ്‌റൈൻ വഹിക്കുന്നതിന്റെ ഭാഗമായി മനാമയിൽ നടന്ന 30-ാമത് ജി.സി.സി ഗതാഗത മന്ത്രിതല യോഗത്തോടനുബന്ധിച്ചായിരുന്നു ചരിത്രപരമായ ഒപ്പുവെക്കൽ ചടങ്ങ്. യോഗത്തിനെത്തിയ ജി.സി.സി സെക്രട്ടറി ജനറൽ ജാസിം മുഹമ്മദ് അൽ ബുദൈവി, വിവിധ രാജ്യങ്ങളിലെ ഗതാഗത വകുപ്പ് പ്രതിനിധികൾ എന്നിവരുമായി കിരീടാവകാശി കൂടിക്കാഴ്ച നടത്തി.
ഹിസ് മജസ്റ്റി കിങ് ഹമദ് ബിൻ ഈസ അൽ ഖലീഫയുടെ മാർഗ്ഗനിർദ്ദേശപ്രകാരം ഗൾഫ് മേഖലയുടെ സാമ്പത്തിക താൽപ്പര്യങ്ങൾ സംരക്ഷിക്കുന്ന എല്ലാ കൂട്ടായ പദ്ധതികൾക്കും ബഹ്‌റൈന്റെ പൂർണ്ണ പിന്തുണ തുടരുമെന്ന് പ്രിൻസ് സൽമാൻ ഉറപ്പുനൽകി. ഉപപ്രധാനമന്ത്രി ശൈഖ് ഖാലിദ് ബിൻ അബ്ദുള്ള അൽ ഖലീഫ, ആഭ്യന്തര മന്ത്രി ജനറൽ ശൈഖ് റാഷിദ് ബിൻ അബ്ദുള്ള അൽ ഖലീഫ, വിദേശകാര്യ മന്ത്രി ഡോ. അബ്ദുല്ലത്തീഫ് ബിൻ റാഷിദ് അൽ സയാനി, ധനകാര്യ ദേശീയ സാമ്പത്തിക കാര്യ മന്ത്രി ശൈഖ് സൽമാൻ ബിൻ ഖലീഫ അൽ ഖലീഫ തുടങ്ങിയ ഉന്നത വ്യക്തിത്വങ്ങളും ചടങ്ങിൽ സന്നിഹിതരായിരുന്നു.
