ലോക പവർലിഫ്റ്റിംങ് താരം മജിസിയ ഭാനു ഇന്ത്യൻ സ്‌കൂൾ വിദ്യാർത്ഥികളുമായി സംവദിച്ചു

മനാമ: കായികരംഗത്തെ ഉയർന്ന നേട്ടങ്ങൾക്ക് വിദ്യാർത്ഥികളെ പ്രചോദനവുമായി  ഇന്ത്യൻ പ്രൊഫഷണൽ വെയ്റ്റ് ലിഫ്റ്റർ മജിസിയ ഭാനു ഇന്ത്യൻ സ്‌കൂൾ വിദ്യാർത്ഥികളുമായി സംവദിച്ചു. റഷ്യയിൽ നടന്ന ലോക പവർലിഫ്റ്റിംഗ് ചാമ്പ്യൻഷിപ്പിൽ 56 കിലോ സീനിയർ വനിതകളുടെ ഓപ്പൺ വിഭാഗത്തിൽ മജിസിയ അടുത്തിടെ സ്വർണം നേടിയിരുന്നു. കേരള സ്‌പോർട്‌സ് കൗൺസിൽ  2018 ൽ  സംഘടിപ്പിച്ച  മിസ്റ്റർ കേരള മത്സരത്തിൽ  കിരീടം നേടിയപ്പോൾ അവർ ഈ മത്സരത്തിൽ ഹിജാബ് ധരിച്ച ആദ്യ വനിതയായി.

‘കായിക രംഗത്തു മികച്ച നേട്ടങ്ങൾ  ആഗ്രഹിക്കുന്ന ഒരു സ്ത്രീക്ക് ഹിജാബ് ഒരിക്കലും ഒരു തടസ്സമല്ലെന്ന് ലോകത്തെ അറിയിക്കാൻ ഞാൻ ആഗ്രഹിക്കുന്നു’  മജിസിയ ഭാനു പറഞ്ഞു. ഹിജാബ് കരുത്തും അന്തസ്സും നൽകുന്നതായി മാജിസ്യ പറഞ്ഞു.  ഇന്ത്യൻ സ്‌കൂൾ ചെയർമാൻ  പ്രിൻസ് എസ് നടരാജൻ, സെക്രട്ടറി സജി ആന്റണി, എക്സിക്യൂട്ടീവ് കമ്മിറ്റി  അംഗങ്ങളായ രാജേഷ് എം എൻ, ബിനു മണ്ണിൽ വറുഗീസ്, സജി ജോർജ്, ദീപക് ഗോപാലകൃഷ്ണൻ, വൈസ് പ്രിൻസിപ്പൽമാർ എന്നിവർ സ്വീകരണ യോഗത്തിൽ പങ്കെടുത്തു. പവർലിഫ്റ്റിംഗ്, പഞ്ചഗുസ്തി എന്നിവയിൽ ദേശീയ, അന്തർദേശീയ തലങ്ങളിൽ നിരവധി മെഡലുകൾ  മജിസിയ  നേടിയിട്ടുണ്ട് . റഷ്യയിൽ നടന്ന ലോക പവർലിഫ്റ്റിംഗ് ചാമ്പ്യൻഷിപ്പിൽ രണ്ടാം തവണയും ഇവർക്ക് സ്വർണം ലഭിച്ചു. മാഹിയിലെ  ഇൻസ്റ്റിറ്റ്യൂട്ട് ഓഫ് ഡെന്റൽ സയൻസസിലെ അവസാന വർഷ ബിഡിഎസ് വിദ്യാർത്ഥിനിയാണ് ഈ കായികതാരം.