മനാമ: കോവിഡ്-19 പശ്ചാത്തലത്തിൽ ബഹ്റൈന്റെ പ്രതിരോധ പ്രവർത്തനങ്ങൾ സഹായവുമായി ലുലു ഗ്രൂപ്പ്. ബഹ്റൈനില് ഭക്ഷ്യ സുരക്ഷ ഉറപ്പു വരുത്തുന്നതിന്റെ ഭാഗമായി ഇന്ത്യയിൽ നിന്ന് ചാർട്ടേഡ് വിമാനത്തിൽ പഴങ്ങളും പച്ചക്കറികളും എത്തിച്ചു. ഇതാദ്യമായാണ് ബഹ്റൈനിലെ ഒരു സ്വകാര്യ കമ്പനി ദേശീയ വിമാന കമ്പനിയായ ഗൾഫ് എയർ വിമാനം ചാർട്ടർ ചെയ്യുന്നത്. ലുലുവിന്റെ നീക്കത്തെ അഭിനന്ദിച്ച് നിരവധി പേർ രംഗത്ത് വന്നിട്ടുണ്ട്.
പ്രതിസന്ധി ഘട്ടത്തിൽ രാജ്യത്ത് ഭക്ഷ്യ സുരക്ഷ ഉറപ്പുവരുത്തുമെന്ന് കിരീടാവകാശിയും ഒന്നാം ഉപപ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫ നേരത്തെ വ്യക്തമാക്കിയിരുന്നു. പിന്നാലെയാണ് ഭക്ഷ്യ ഉത്പ്പന്നങ്ങളുമായി ലുലു ബഹ്റൈനിൽ വിമാനമിറങ്ങിയത്. രാജ്യത്തോടുള്ള തങ്ങളുടെ പ്രതിബദ്ധതയും ഉത്തരവാദിത്വവുമാണ് ഇതിന് പ്രേരിപ്പിച്ചതെന്ന് ലുലു ഗ്രൂപ്പ് ഡയറക്ടർ ജുസെർ രൂപവാല പറഞ്ഞു. ആവശ്യമെങ്കിൽ ഇനിയും ഭക്ഷ്യവസ്തുക്കൾ എത്തിക്കുമെന്നും മാനേജ്മെന്റ് വ്യക്തമാക്കിയിട്ടുണ്ട്.
പഴവും പച്ചക്കറികളുമാണ് ഗൾഫ് എയർ വിമാനത്തിൽ ലുലു എത്തിച്ചിരിക്കുന്നത്. വരും ദിവസങ്ങളിൽ പ്രതിസന്ധിയുണ്ടാവുകയാണെങ്കിൽ കൂടുതൽ ഭക്ഷണ പദാർത്ഥങ്ങൾ എത്തിക്കുമെന്നാണ് ലുലു മാനേജ്മെന്റ് നൽകുന്ന സൂചന.
വീഡിയോ: