സമാജം ചാര്‍ട്ടേര്‍ഡ് വിമാനം; സജ്ജീകരണങ്ങള്‍ പൂര്‍ത്തിയായി, അന്തിമ അനുമതി കിട്ടിയാലുടന്‍ യാത്ര

മനാമ: ബഹ്റൈന്‍ കേരളീയ സമാജത്തിന്റെ നേതൃത്വത്തിലുള്ള ചാര്‍ട്ടേര്‍ഡ് വിമാനം സജ്ജീകരണങ്ങള്‍ പൂര്‍ത്തിയായി. അന്തിമ അനുമതി കിട്ടിയാലുടന്‍ യാത്ര തിയതി നിശ്ചയിക്കും. അന്തിമ അനുമതികള്‍ക്കായ് കാത്തിരിക്കുകയാണെന്നും സമാജത്തിന്റെ ഭാഗത്ത് നിന്നുള്ള എല്ലാ നടപടികളും പൂര്‍ത്തികരിച്ചതായും സമാജം പത്രകുറിപ്പില്‍ അറിയിച്ചിട്ടുണ്ട്.

കേന്ദ്ര സംസ്ഥാന സര്‍ക്കാറുകളാവശ്യപ്പെട്ട ചാര്‍ട്ടേര്‍ഡ് വിമാനത്തിലെ യാത്രികരുടെ മുഴുവന്‍ രേഖകളും വിശദാംശങ്ങളും കൈമാറുകയും വിമാന കമ്പനികളുമായുള്ള ധാരണാപത്രം ഒപ്പുവെക്കുകയും ചെയ്തിട്ടുണ്ട്. അടിയന്തിരമായി നാട്ടിലേക്ക് യാത്ര ചെയ്യേണ്ട രോഗികള്‍, ഗര്‍ഭിണികള്‍, ജോലിയും താമസ സ്ഥലങ്ങളും നഷ്ടപ്പെട്ട മലയാളികള്‍ എന്നിവരുടെ നിരന്തര അഭ്യര്‍ത്ഥന മാനിച്ചാണ് ബഹറിന്‍ കേരളീയ സമാജം ബദല്‍ യാത്രാമാര്‍ഗ്ഗമായ ചാര്‍ട്ടേഡ് ഫ്‌ലൈറ്റിന് വേണ്ടി ശ്രമിച്ചത്.

സംസ്ഥാന സര്‍ക്കാരുമായും കേന്ദ്ര വ്യോമയാന മന്ത്രാലയുവുമായും നിരന്തരം ബന്ധപ്പെട്ടുവരികയാണെന്നും അനുകൂലമായ അന്തിമ അനുമതികള്‍ ലഭ്യമാവുന്ന മുറയ്ക്ക് വിമാനങ്ങള്‍ പുറപ്പെടുമെന്നും പ്രസിഡണ്ട് പി.വി.രാധാകൃഷ്ണ പിള്ളയും ജനറല്‍ സെക്രട്ടറി വര്‍ഗ്ഗീസ് കാരക്കലും സംയുക്ത പ്രസ്താവനയില്‍ വ്യക്തമാക്കി.