മനാമ: ബഹ്റൈനില്‍ കുടുങ്ങിയ സൗദി പ്രവാസികള്‍ക്ക് സമാശ്വാസമായി കെ.എം.സി.സി ബഹ്റൈന് ഒരുക്കിയ ചാര്‍ട്ടേഡ് വിമാനങ്ങള്‍ സൗദിയിലെത്തി. റിയാദ്, ദമ്മാം എന്നിവിടങ്ങളിലേക്കാണ് രണ്ടു ദിവസങ്ങളിലായി ചാർട്ടേഡ് വിമാനങ്ങള്‍ സർവിസ് നടത്തിയത്. 320ഓളം യാത്രക്കാർ ഈ വിമാനങ്ങളിൽ സൗദിയിലെത്തി.
കിങ് ഫഹദ് കോസ്വേ വഴിയുള്ള യാത്ര മുടങ്ങി പ്രതിസന്ധിയിലായ പ്രവാസികളുടെ പ്രയാസങ്ങള്‍ കണ്ടറിഞ്ഞാണ് കെ.എം.സി.സി ബഹ്റൈന് സംസ്ഥാന കമ്മിറ്റി ചാര്‍ട്ടേഡ് വിമാന സര്‍വിസ് ഒരുക്കിയത്. പ്രവാസികളില്‍ ചിലര്‍ക്കെങ്കിലും ആശ്വാസമേകാന്‍ സാധിച്ചതില്‍ അഭിമാനമുണ്ടെന്ന് കെ.എം.സി.സി ബഹ്റൈന് സംസ്ഥാന പ്രസിഡൻറ് ഹബീബ് റഹ്‌മാന്‍, ജന. സെക്രട്ടറി അസൈനാര്‍ കളത്തിങ്കല്‍ എന്നിവര്‍ പറഞ്ഞു. പ്രതിസന്ധിഘട്ടങ്ങളില്‍ പ്രവാസ സഹോദരന്മാര്‍ക്ക് കരുതലേകേണ്ടത് ഏവരുടെയും കടമയാണ്. ഇതിന് എല്ലാ സഹകരണവും നല്‍കിയവര്‍ക്ക് നന്ദി അറിയിക്കുന്നതായും നേതാക്കള്‍ പറഞ്ഞു.
ഫ്ലൈ സാഫ്രോണ് ട്രാവല്‍സുമായി സഹകരിച്ചാണ് ചാര്‍ട്ടേഡ് വിമാനം ഒരുക്കിയത്. ട്രാവല്‍സ് ഉടമ വി.പി. അഫ്‌സല്‍, പ്രതിനിധികളായ ഷമീർ ഹംസ, സനു സത്താർ, കെ.എം.സി.സി ബഹ്റൈന് നേതാക്കളായ ഗഫൂര്‍ കൈപ്പമംഗലം, ഷാഫി പാറക്കട്ട എന്നിവരാണ് പ്രവര്‍ത്തനങ്ങള്‍ക്ക് നേതൃത്വം നല്‍കിയത്. ആശങ്കകള്‍ മാറി സൗദിയിൽ എത്തിയതിൻറെ സന്തോഷത്തിലാണ് യാത്രക്കാര്‍.
