മനാമ: അഫ്ഗാനിസ്താന് വീണ്ടും ജീവകാരുണ്യ സഹായവുമായി റോയൽ ഹ്യുമാനിറ്റേറിയൻ ഫൗണ്ടേഷൻ. മരുന്ന്, ഭക്ഷണം ഉൾപ്പെടെ അവശ്യ വസ്തുക്കൾ അടങ്ങിയ മൂന്നാം ഘട്ട സഹായം കഴിഞ്ഞ ദിവസം അയച്ചു. രാജാവ് ഹമദ് ബിൻ ഈസ ആൽ ഖലീഫയുടെ ഉത്തരവുപ്രകാരമാണ് സഹായ സാമഗ്രികൾ അയക്കുന്നത്.
അഫ്ഗാനിസ്താന് സഹായം നൽകാനുള്ള ബഹ്റൈൻറെ ശ്രമങ്ങളുടെ തുടർച്ചയായാണ് മൂന്നാം ഘട്ട സഹായം അയച്ചതെന്ന് ഫൗണ്ടേഷൻ സെക്രട്ടറി ജനറൽ ഡോ മുസ്തഫ അൽ സായിദ് പറഞ്ഞു. ബഹ്റൈൻറെ സഹായത്തിന് അഫ്ഗാൻ സർക്കാർ പ്രതിനിധി ഹമദ് രാജാവിന് നന്ദി അറിയിച്ചു.
ലോകമെങ്ങുമുളള ദുരിതബാധിതർക്ക് സഹായമെത്തിക്കുന്ന ഹമദ് രാജാവിൻറെ ഉദ്യമത്തെ രാജാവിൻറെ ചാരിറ്റി, യുവജന കാര്യങ്ങൾക്കായുള്ള പ്രതിനിധി ശൈഖ് നാസർ ബിൻ ഹമദ് ആൽ ഖലീഫ പ്രകീർത്തിച്ചു. കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് ആൽ ഖലീഫയുടെ നേതൃത്വത്തിലുള്ള സർക്കാർ നൽകുന്ന പിന്തുണക്കും അദ്ദേഹം നന്ദി പറഞ്ഞു.
