ശിക്ഷാ രീതികൾ പരിഷ്​കരിച്ച ഉത്തരവിനെ സ്വാഗതം ചെയ്ത് ബഹ്‌റൈൻ മന്ത്രിസഭാ യോഗം

മനാമ: ബദൽ ശിക്ഷാ രീതികൾ പരിഷ്​കരിച്ച്​ രാജാവ്​ ഹമദ്​ ബിൻ ഈസ ആൽ ഖലീഫ പുറപ്പെടുവിച്ച ഉത്തരവിനെ മന്ത്രിസഭ ​സ്വാഗതം ചെയ്​തു. ശിക്ഷാ വിധി ലഭിച്ചവരെ സാമൂഹിക സേവന മേഖലകളിൽ ഉപയോഗപ്പെടുത്താൻ ഇതു​വഴി സാധിക്കും. സമൂഹത്തിൽ സദ്​​​ഫലങ്ങളുദ്ദേശിച്ച്​ നടപ്പാക്കാൻ നിർദേശിച്ചിരിക്കുന്ന ഈ പദ്ധതി ക്രിയാത്​മകമായി ഉപയോഗപ്പെടുത്താൻ ആഭ്യന്തര മന്ത്രാലയത്തിന്​ സാധിക്കുമെന്ന പ്രതീക്ഷയും പങ്കുവെച്ചു.

സൈപ്രസ്​ പ്രസിഡൻറ്​ നി​കോസ്​ അനാസ്​താസിയാദെസിൻ്റെ ബഹ്​റൈൻ സന്ദർശനം ഇരുരാജ്യവും തമ്മിലുള്ള ബന്ധം ശക്തിപ്പെടുത്താനും വിവിധ മേഖലകളിലുള്ള സഹകരണം വ്യാപിപ്പിക്കാനും ഇടയാക്കുമെന്ന്​ കാബിനറ്റ്​ വിലയിരുത്തി. ഹമദ്​ രാജാവുമായുള്ള അദ്ദേഹത്തിൻെറ കൂടിക്കാഴ്ച പ്രതീക്ഷയോടെയാണ്​ കാണുന്നത്​.

വിവിധ രാജ്യങ്ങളുമായി മികച്ച നയതന്ത്ര ബന്ധവും സഹകരണവും രാജ്യത്തിന്​ കരുത്ത്​ പകരുമെന്നും മന്ത്രിസഭ വ്യക്​തമാക്കി. അന്താരാഷ്​ട്ര ജനാധിപത്യ ദിന​മാചരിക്കുന്ന വേളയിൽ രാജ്യത്തെ ജനാധിപത്യ നടപടികൾക്ക്​ ഗതിവേഗം പകരാൻ ഹമദ്​ രാജാവിൻ്റെ കാഴ്​ചപ്പാടുകൾക്ക്​ സാധ്യമായതായി യോഗം വിലയിരുത്തി.

ജനങ്ങളുടെ പ്രശ്​നങ്ങൾ അടിത്തട്ടിൽനിന്നും മനസ്സിലാക്കാനും അവ പരിഹരിക്കാനും ബഹ്​റൈനിലെ ജനാധിപത്യ സംവിധാനം പ്രാപ്​തമാണ്​​. വികസനവും പുരോഗതിയും നേടിയെടുക്കാനുള്ള വഴിയായി അവയെ ഉ​പയോഗപ്പെടുത്താൻ സാധിച്ചതായും വ്യക്തമാക്കി. ഔദ്യോഗിക, സ്​പെഷൽ, നയതന്ത്ര വിസകളുള്ളവർക്ക്​ ചാർജ്​ ഒഴിവാക്കുന്ന വിഷയത്തിൽ ബഹ്​റൈനും ശ്രീലങ്കയും തമ്മിൽ സഹകരണക്കരാറിൽ ഒപ്പുവെക്കാനുള്ള നിർദേശത്തിന്​ കാബിനറ്റ്​ അംഗീകാരം നൽകി.

ഓയിൽ, ഗ്യാസ്​ മേഖലയിൽ മൊറോക്കോയും ബഹ്​റൈനും തമ്മിൽ സഹകരിക്കുന്നതിനുള്ള മന്ത്രിതല സമിതിയുടെ നിർദേശത്തിനും അംഗീകാരമായി. ഉച്ചവിശ്രമ സമയം നടപ്പാക്കുന്നതുമായി ബന്ധപ്പെട്ട്​ ജൂലൈ, ആഗസ്​റ്റ്​​ മാ​സങ്ങളിൽ തൊഴിലിടങ്ങളിൽ നടത്തിയ ​പരിശോധനകളെക്കുറിച്ച്​​ തൊഴിൽ-സാമൂഹിക ക്ഷേമ കാര്യമന്ത്രി വിശദീകരിച്ചു.

11,342 പരിശോധനകൾ വിവിധ തൊഴിലിടങ്ങളിൽ നടത്തിയതായും നിയമം പാലിക്കുന്നതിൽ മിക്ക സ്ഥാപനങ്ങളും ജാഗ്രത പുലർത്തിയതായും മന്ത്രി വ്യക്തമാക്കി. സർക്കാർ സ്​കൂളുകൾ ഐടി അധിഷ്​ഠിത സ്​കൂളുകളാക്കി മാറ്റുന്നതിന്​ മൈക്രോസോഫ്​റ്റുമായുള്ള സഹകരണം ഗുണം ചെയ്​തതായി യോഗം വിലയിരുത്തി.