മനാമ:
കാർഷിക വികസന ദേശീയ സംരംഭത്തിന്റെ പ്രസിഡന്റും രാജാവുമായ ഹമദ് ബിൻ ഈസ അൽ ഖലീഫയുടെ ഭാര്യ, രാജകുമാരി സബീക്ക ബിൻത് ഇബ്രാഹിം അൽ ഖലീഫയുടെ നേതൃത്വത്തിൽ ആരംഭിച്ച ദേശീയ “ഫോർഎവർ ഗ്രീൻ” കാമ്പയിന് ലുലു ഹൈപ്പർമാർക്കറ്റ് പിന്തുണ പ്രഖ്യാപിച്ചു. കാമ്പെയ്‌നെ പിന്തുണയ്ക്കുന്നതിന്റെ ഭാഗമായി, ലുലു ഉപഭോക്താക്കൾക്ക് ഓരോ പർച്ചേസിനും ഒരു പ്ലാന്റ് കട്ടിംഗ് സൗജന്യമായി ലഭിക്കും. ഈ പ്രത്യേക ഓഫർ 2021 ഡിസംബർ 31 വരെ രാജ്യത്തുടനീളമുള്ള എല്ലാ ലുലു ഹൈപ്പർമാർക്കറ്റുകളിലും പ്രവർത്തിക്കും.
ഇതോടനുബന്ധിച്ച് ലുലുവിലെ ദാന മാളിൽ നടന്ന കാമ്പയിനും കാർഷിക വിപണിയും എൻഐഎഡി സെക്രട്ടറി ജനറൽ ശൈഖ മാരം അൽ ഖലീഫ ഉദ്ഘാടനം ചെയ്തു. ഈ കാമ്പയിനിലൂടെ ബഹ്‌റൈനിലെ കാലാവസ്ഥയിൽ വലിയ മാറ്റമുണ്ടാകുമെന്ന് ലുലു ഗ്രൂപ്പ് ഡയറക്ടർ ശ്രീ. ജുസർ രൂപാവാല പറഞ്ഞു.ഹരിതവത്കരണത്തിനുള്ള ദേശീയ പദ്ധതിയുമായി സഹകരിക്കാനും ബഹ്റൈനി കർഷകരെ പിന്തുണക്കാനും സന്നദ്ധത പ്രകടിപ്പിച്ച ലുലു ഗ്രൂപ്പിനെ ശൈഖ മാറം അഭിനന്ദിച്ചു.
ബഹ്‌റൈനിലെ കാർഷിക മേഖലയുടെ വികസനം സുസ്ഥിരമാക്കുന്നതിന് പൊതു-സ്വകാര്യ മേഖലകളുമായുള്ള ഏകോപനത്തിലൂടെ സംസ്ഥാനത്തിന്റെ തന്ത്രങ്ങളെ പിന്തുണയ്‌ക്കുക, രാജ്യത്തിന്റെ സൗന്ദര്യാത്മക സവിശേഷതകളും കാർഷികമേഖലയിലുള്ള അതിന്റെ താൽപ്പര്യവും ഉയർത്തിക്കാട്ടുക എന്നിവയാണ് കാമ്പയിൻ ലക്ഷ്യമിടുന്നത്.
