മനാമ: ഫോർമുല വൺ ബഹ്റൈൻ ഗ്രാൻഡ് പ്രീയുടെ ആവേശകരമായ ഫൈനൽ മത്സരം ഇന്ന് ഞായറാഴ്ച ബഹ്റൈൻ ഇന്റർനാഷണൽ സർക്യൂട്ടിൽ നടക്കും. ശനിയാഴ്ച നടന്ന യോഗ്യത മത്സരത്തിൽ ഫെറാരിയുടെ ചാൾസ് ലെക്ലർക്ക് ഒന്നാമതായി ഫിനിഷ് ചെയ്ത് പോൾ പൊസിഷൻ സ്വന്തമാക്കി.
നിലവിലെ ലോക ചാമ്പ്യൻ റെഡ്ബുള്ളിന്റെ മാക്സ് വെസ്റ്റാപ്പൻ രണ്ടാമതും ഫെറാരിയുടെ കാർലോസ് സെയിൻസ് മൂന്നാമതും ഫിനിഷ് ചെയ്തു. ഏഴ് തവണ ലോക ചാമ്പ്യനായ മെഴ്സിഡസിന്റെ ലൂയിസ് ഹാമിൽട്ടൺ അഞ്ചാം സ്ഥാനത്താണ് മത്സരം പൂർത്തിയാക്കിയത്.
ശനിയാഴ്ച ഉച്ചക്ക് നടന്ന അവസാന പരിശീലനത്തിൽ മാക്സ് വെസ്റ്റാപ്പനാണ് മുന്നിലെത്തിയത്. ചാൾസ് ലെക്ലർക്ക് രണ്ടാമതും റെഡ്ബുള്ളിെന്‍റ സെർജിയോ പെരെസ് മൂന്നാമതുമാണ് ഫിനിഷ് ചെയ്തത്. രാവിലെ നടന്ന ഫോർമുല 3 സ്പ്രിന്‍റ് റേസിൽ ഹൈടെക് ഗ്രാൻഡ് പ്രീയുടെ ഇസാക്ക് ഹദ്ജാർ ഒന്നാമതെത്തി.
പ്രേമ റേസിങ്ങിന്റെ ഒലിവർ ബിയർമാൻ രണ്ടാം സ്ഥാനവും എം.പി മോട്ടോർ സ്പോർട്ടിന്റെ അലക്സാണ്ടർ സ്മൊയ്ലർ മൂന്നാം സ്ഥാനവും നേടി. എം.പി മോട്ടോർ സ്പോർട്ടിനുവേണ്ടി ഇറങ്ങിയ ഇന്ത്യൻ താരം കുഷ് മൈനി 15ാമനായാണ് മത്സരം പൂർത്തിയാക്കിയത്. ഇന്ന്, ഞായറാഴ്ച വൈകീട്ട് ആറിനാണ് ഫോർമുല 1 ഗ്രാൻഡ് പ്രീയുടെ ആവേശകരമായ ഫൈനൽ അരങ്ങേറുക. രാവിലെ 11.45ന് ഫോർമുല 3 ഫീച്ചർ റേസും 1.40ന് ഫോർമുല 2 ഫീച്ചർ റേസും നടക്കും.
