മനാമ: ബഹ്റൈൻ കേരളീയസമാജത്തിൽ നടന്നുവരുന്ന ആറാമത് അന്താരാഷ്ട്ര പുസ്തകോത്സവത്തോടനുബന്ധിച്ച് സമാജം മലയാളം പാഠശാല സംഘടിപ്പിക്കുന്ന കളറിങ് മത്സരം ‘നിറച്ചാർത്ത്’ ഇന്ന് വൈകീട്ട് അഞ്ചിന് നടക്കും. തുടർന്ന്, പ്രശസ്ത ബബ്ൾ ആർട്ട് കലാകാരൻ ഡോ.സഹൽ ബാബു അവതരിപ്പിക്കുന്ന ബബ്ൾ ആർട്ട് ഷോയും അരങ്ങേറും.
രാത്രി എട്ടിന് നടക്കുന്ന സാംസ്കാരിക സമ്മേളനത്തിൽ മുൻ കേന്ദ്രമന്ത്രിയും സിവിൽ സർവിസ് ഉദ്യോഗസ്ഥനും പ്രഭാഷകനുമായ അൽഫോൺസ് കണ്ണന്താനം മുഖ്യാതിഥിയായി പങ്കെടുക്കും.
പ്രമുഖ നർത്തകി ഷീന ചന്ദ്രദാസും സംഘവും അവതരിപ്പിക്കുന്ന ‘കാവ്യാഞ്ജലി’ നൃത്താവിഷ്കാരം, എം.എം.എം.ഇ അവതരിപ്പിക്കുന്ന ഡാൻസ് ഫ്യൂഷൻ, സുഗതകുമാരിയുടെ കവിതയെ അവലംബിച്ച് ദിവ്യ ലക്ഷ്മി ദിനേഷ് അവതരിപ്പിക്കുന്ന മോഹിനിയാട്ടം തുടങ്ങിയ കലാപരിപാടികളും സാംസ്കാരികോത്സവത്തിന്റെ ഭാഗമായി നടക്കുമെന്ന് സംഘാടകർ അറിയിച്ചു.