മനാമ: ബഹ്‌റൈനിലെ ജീവകാരുണ്യ മേഖലയില്‍ സജീവമായി പ്രവര്‍ത്തിക്കുന്ന ഹോപ്പ് ബഹ്റൈന് ചികിത്സാ സഹായം നല്‍കി. കണ്ണൂര്‍ അഴീക്കോട് സ്വദേശി അന്‍സാരിക്കാണ് സഹായം നല്‍കിയത്. ജോലി സ്ഥലത്ത് വച്ച് അപകടം സംഭവിച്ചതിനെ തുടര്‍ന്ന് മാസങ്ങളായി ചികിത്സയിലായിരുന്നു. ചികിത്സയ്ക്കിടയില്‍ പ്രമേഹരോഗിയായ അദ്ദേഹത്തിന്റെ രണ്ട് വിരലുകള്‍ മുറിച്ചു മാറ്റേണ്ടി വന്നു.
ശാരീരിക ബുദ്ധിമുട്ടുകള്‍ മൂലം ബഹ്റൈനില്‍ തുടര്‍ന്ന് ജോലി ചെയ്യാന്‍ അദ്ദേഹത്തിന് സാധിക്കില്ല. ഈ സാഹചര്യത്തിലാണ് ഹോപ്പ് സഹായവുമായി മുന്നോട്ടുവന്നത്. ഹോപ്പ് അംഗങ്ങളില്‍ നിന്നും സമാഹരിച്ച തുക (63,147 രൂപ), ഹോപ്പ് എക്‌സിക്യൂട്ടീവ് അംഗം ഫൈസല്‍ പട്ടാണ്ടി കോര്‍ഡിനേറ്റര്‍ റഫീഖ് പൊന്നാനിക്ക് കൈമാറി.
തുടര്‍ചികിത്സയ്ക്ക് നാട്ടിലേയ്ക്ക് മടങ്ങിയ അദ്ദേഹത്തിന്റെ അക്കൗണ്ടില്‍ സഹായതുക അയച്ചുനല്‍കിയതായി ഹോപ്പിന്റെ ഭാരവാഹികള്‍ അറിയിച്ചു. കൂടാതെ യാത്രാവേളയില്‍ കുടുംബത്തിന് ഗള്‍ഫ് കിറ്റും ഹോപ്പ് നല്‍കിയിരുന്നു.
