മനാമ: ബഹ്റൈനില്‍ തീരദേശ മേഖലകളില്‍ നടത്തിയ ഏകോപിത പരിശോധനാ കാമ്പയിനുകളില്‍ റെസിഡന്‍സി നിയമലംഘനങ്ങളും നിയമവിരുദ്ധ മത്സ്യബന്ധന പ്രവര്‍ത്തനങ്ങളും ഉള്‍പ്പെടെ നിരവധി നിയമലംഘനങ്ങള്‍ അധികൃതര്‍ കണ്ടെത്തിയതായി ആഭ്യന്തര മന്ത്രാലയം അറിയിച്ചു. സമുദ്ര പ്രവര്‍ത്തനങ്ങളെ ലക്ഷ്യമിട്ടായിരുന്നു കാമ്പയിന്‍.
ദേശീയത, പാസ്പോര്‍ട്ട്, റെസിഡന്‍സ് അഫയേഴ്സ്, ക്യാപിറ്റല്‍ ഗവര്‍ണറേറ്റ് പോലീസ് ഡയറക്ടറേറ്റ്, വ്യവസായ- വാണിജ്യ മന്ത്രാലയം, ലേബര്‍ മാര്‍ക്കറ്റ് റെഗുലേറ്ററി അതോറിറ്റി എന്നിവയുമായി സഹകരിച്ച് കോസ്റ്റ്ഗാര്‍ഡാണ് ഓപ്പറേഷന് നേതൃത്വം നല്‍കിയത്. കുറ്റവാളികള്‍ക്കെതിരെ നിയമനടപടി സ്വീകരിച്ചിട്ടുണ്ടെന്ന് ഉദ്യോഗസ്ഥര്‍ അറിയിച്ചു.
മത്സ്യബന്ധനത്തെയും സമുദ്ര രീതികളെയും നിയന്ത്രിക്കുന്ന നിയമങ്ങള്‍ കര്‍ശനമായി പാലിക്കണമെന്ന് കോസ്റ്റ്ഗാര്‍ഡ് പൊതുജനങ്ങളോട് അഭ്യര്‍ത്ഥിച്ചു. സമുദ്ര സുരക്ഷ വര്‍ദ്ധിപ്പിക്കുന്നതിനും ബഹ്റൈന്റെ സമുദ്ര വിഭവങ്ങള്‍ സംരക്ഷിക്കുന്നതിനുമായി ഇത്തരം പരിശോധനാ കാമ്പയിനുകള്‍ പതിവായി തുടരുമെന്നും അധികൃതര്‍ വ്യക്തമാക്കി.
