മനാമ: ഇന്ത്യൻ സ്കൂൾ ബാഹറിൻ അധികൃതർ വിളിച്ചുചേർത്ത പ്രത്യേക പൊതുയോഗത്തിൽ എല്ലാ രക്ഷിതാക്കളും സജീവമായി പങ്കെടുക്കണമെന്ന് പ്രോഗ്രസീവ് പേരന്റ്സ് അലയൻസ് ആഹ്വാനം ചെയ്തു. സെപ്റ്റംബർ 25 വെള്ളിയാഴ്ച രാവിലെ 8:30-ന് സ്കൂൾ വളപ്പിലാണ് യോഗം നടക്കുന്നത്.
സ്കൂളിന്റെ നിലവിലെ അവസ്ഥ, ഭാവി ദിശാബോധം, മറ്റ് സുപ്രധാന വിഷയങ്ങൾ എന്നിവ നേരിട്ടറിഞ്ഞ് സംശയനിവാരണം വരുത്താൻ രക്ഷിതാക്കൾക്ക് ലഭിക്കുന്ന വലിയൊരു അവസരമാണ് ഈ ഇ.ജി.എമ്മെന്ന് പി.പി.എ വിലയിരുത്തി.
അടുത്തിടെയായി സോഷ്യൽ മീഡിയയിലും വാട്ട്സ്ആപ്പ് ഗ്രൂപ്പുകളിലും സ്കൂളുമായി ബന്ധപ്പെട്ട് പ്രചരിക്കുന്ന അഭ്യൂഹങ്ങൾക്കും അപൂർണ്ണമായ വിവരങ്ങൾക്കും വിരാമമിട്ട്, ഔദ്യോഗിക വിവരങ്ങളുടെ അടിസ്ഥാനത്തിൽ വസ്തുതകൾ മനസ്സിലാക്കാൻ രക്ഷിതാക്കൾ യോഗത്തിൽ നേരിട്ടെത്തേണ്ടതുണ്ട്.
വസ്തുതകൾ അറിയാനും കെട്ടിപ്പടുക്കാനുമുള്ള അവസരം:
ഇതൊരു കേവല ഔദ്യോഗിക ചടങ്ങ് മാത്രമായി കാണരുത്. ജനാധിപത്യപരമായ സംവാദങ്ങൾക്കും ഉത്തരവാദിത്തമുള്ള പങ്കാളിത്തത്തിനും രക്ഷിതാക്കൾ ഈ വേദി ഉപയോഗിക്കണം. അഭിപ്രായവ്യത്യാസങ്ങൾ സ്വാഭാവികമാണെങ്കിലും, പരസ്പര ബഹുമാനത്തോടെയും വസ്തുതകളുടെ അടിസ്ഥാനത്തിലും മുന്നോട്ടുപോയാൽ അവ പരിഹരിക്കാൻ സാധിക്കും. സംഘർഷത്തിനല്ല, മറിച്ച് വ്യക്തതയ്ക്കും നിർമ്മാണാത്മകമായ ആശയവിനിമയത്തിനുമാണ് രക്ഷിതാക്കൾ പ്രാധാന്യം നൽകേണ്ടതെന്ന് പി.പി.എ ചൂണ്ടിക്കാട്ടി.
നമ്മുടെ സ്ഥാപനത്തിന്റെ ഭാവി സംരക്ഷിക്കുക:
തലമുറകളായി ബഹ്റൈൻ പ്രവാസി സമൂഹത്തിന് സേവനം ചെയ്യുന്ന ഈ മഹത്പ്രസ്ഥാനത്തിന്റെ ഭാവി സുരക്ഷിതമാക്കേണ്ടത് രക്ഷിതാക്കളുടെ കൂട്ടായ ഉത്തരവാദിത്തമാണ്. സ്വന്തം കുട്ടികളുടെ വിദ്യാഭ്യാസത്തിനും ക്ഷേമത്തിനും ഉപരിയായി, വരുംതലമുറകൾക്കായി സ്ഥാപനത്തെ കരുത്തുറ്റതാക്കി നിലനിർത്താൻ നിർമ്മാണാത്മകമായ വിമർശനങ്ങളും ഉത്തരവാദിത്തമുള്ള പങ്കാളിത്തവും അത്യാവശ്യമാണ്.
നമ്മുടെ കുട്ടികൾക്കും പ്രവാസി സമൂഹത്തിനും സ്കൂളിന്റെ ഉജ്ജ്വലമായ ഭാവിക്കും വേണ്ടി എല്ലാ രക്ഷിതാക്കളും വെള്ളിയാഴ്ച നടക്കുന്ന പൊതുയോഗത്തിൽ വൻതോതിൽ പങ്കെടുക്കണമെന്ന് പി.പി.എ വക്താക്കൾ അഭ്യർത്ഥിച്ചു.
