മനാമ: ബഹ്റൈൻ കേരളീയ സമാജത്തിന്റെ ഇത്തവണത്തെ ഓണാഘോഷ പരിപാടിയായ ‘ശ്രാവണം 2026’-ന് പ്രൗഢഗംഭീരമായ തുടക്കമായി. ജൂലൈ 31-ന് സമാജം ഡയമണ്ട് ജൂബിലി ഹാളിൽ നടന്ന ചടങ്ങിൽ സമാജം പ്രസിഡന്റ് പി. വി. രാധാകൃഷ്ണപിള്ള, ജനറൽ സെക്രട്ടറി വർഗീസ് കാരക്കൽ എന്നിവരുടെ നേതൃത്വത്തിൽ ആഘോഷങ്ങൾക്ക് ഔദ്യോഗികമായി കൊടിയേറി.
സമാജം മുതിർന്ന അംഗം സി. പി. വർഗീസ്, പ്രയോജകരായ സുരേഷ് (ജനറൽ മാനേജർ, സിഞ്ച് എക്സ്ചേഞ്ച്), സിയാദ് (സി.ഇ.ഒ, ഷിഫാ ഹോസ്പിറ്റൽ ഗ്രൂപ്പ്), ഇളങ്കോ (ജനറൽ മാനേജർ, കെല്ലർ), ഗോപികൃഷ്ണൻ (ജനറൽ മാനേജർ, നാസ് ഇലക്ട്രിക്കൽ), റഹീം വാവക്കുഞ്ഞ് തുടങ്ങിയവരും കമ്മറ്റി ഭാരവാഹികളും ചടങ്ങിൽ പങ്കെടുത്തു. ചടങ്ങിന്റെ ഭാഗമായി ‘ശ്രാവണം 2026’ കമ്മറ്റി ഓഫീസിന്റെ ഉദ്ഘാടനവും സോപാനം വാദ്യകലാസംഘത്തിന്റെ പാണ്ടിമേളവും ബി.കെ.എസ്. മ്യൂസിക് ക്ലബ്ബിന്റെ സംഘഗാനവും അരങ്ങേറി.
പ്രധാന ആകർഷണങ്ങളും കലാപരിപാടികളും:
രണ്ടുമാസത്തിലേറെ നീളുന്ന ആഘോഷപരമ്പരയിൽ കേരളത്തിൽ നിന്നുള്ള അൻപതിലധികം പ്രമുഖ കലാകാരന്മാരും അഞ്ഞൂറിലധികം പ്രാദേശിക കലാപ്രവർത്തകരും അണിനിരക്കും.
-
സംഗീതവിരുന്നുകൾ: കെ. എസ്. ചിത്ര, വൈക്കം വിജയലക്ഷ്മി, പന്തളം ബാലൻ, കുമാരി ഗംഗ ശശിധരൻ തുടങ്ങിയ പ്രമുഖർ പങ്കെടുക്കും. ബി.കെ.എസ്. മ്യൂസിക് ക്ലബ്ബിന്റെ ‘ഹൃദയാഞ്ജലി’ (എസ്.പി.ബി – എസ്. ജാനകി ട്രിബ്യൂട്ട്), ടീം സിത്താർ ഓർക്കസ്ട്ര, കുമാരി ഗംഗ ശശിധരന്റെ വയലിൻ കച്ചേരി, മാസ്റ്റർ നീൽഗ്രീവിന്റെ വീണക്കച്ചേരി, ആരവം മരം ബാൻഡിന്റെ നാടൻപാട്ടുകൾ എന്നിവയും ഉൾപ്പെടുന്നു.
-
സാംസ്കാരിക അവതരണങ്ങൾ: നൂറിലധികം വനിതകൾ അണിനിരക്കുന്ന മെഗാ തിരുവാതിരയും നൂറിലധികം കലാകാരന്മാരുടെ ചരടുപിന്നിക്കളിയും പ്രധാന ആകർഷണങ്ങളാകും.
-
പ്രത്യേക പരിപാടികൾ:
-
സെപ്റ്റംബർ 4: അവതാരകൻ രാജ് കലേഷ് മുഖ്യാതിഥിയായെത്തുന്ന ‘രുചിമേള’.
-
സെപ്റ്റംബർ 24: മെറിൻ ഗ്രിഗറി, ദിഷ പ്രകാശ്, ഗോകുൽ, അർജുൻ എന്നിവരുടെ മ്യൂസിക്കൽ നൈറ്റ്.
-
സെപ്റ്റംബർ 25: കെ. എസ്. ചിത്ര, നിഷാദ്, അനാമിക, വേദമിത്ര എന്നിവർ അവതരിപ്പിക്കുന്ന ‘ചിത്രാഞ്ജലി’ സംഗീതവിരുന്ന്.
-
വിവിധ മത്സരങ്ങളും ഓണസദ്യയും:
ഓഗസ്റ്റ്, സെപ്റ്റംബർ മാസങ്ങളിലായി വടംവലി, കബഡി, പൂക്കളമത്സരം, തിരുവാതിരക്കളി, ഫ്ലാഷ് മോബ്, പായസ മത്സരം, സിനിമാറ്റിക് ഡാൻസ്, ഓണപ്പാട്ട് തുടങ്ങി വൈവിധ്യമാർന്ന മത്സരങ്ങൾ സംഘടിപ്പിക്കും.
ആഘോഷങ്ങൾക്ക് സമാപനം കുറിച്ച് ഒക്ടോബർ 2-ന് പ്രശസ്ത പാചകവിദഗ്ധൻ പഴയിടം മോഹനൻ നമ്പൂതിരിയുടെ നേതൃത്വത്തിൽ അയ്യായിരം പേർക്കായി വിഭവസമൃദ്ധമായ മഹാ ഓണസദ്യ ഒരുക്കും.
ഹരികൃഷ്ണൻ ബി. നായർ കൺവീനറായ 200 അംഗ ഓണാഘോഷ കമ്മിറ്റിയാണ് പരിപാടികളുടെ ഏകോപനം നിർവഹിക്കുന്നത്. ‘ശ്രാവണം 2026’-ന്റെ മുഴുവൻ പരിപാടികളിലേക്കും സമാജം അംഗങ്ങളെയും ബഹ്റൈനിലെ മുഴുവൻ പ്രവാസി മലയാളി കുടുംബങ്ങളെയും സ്വാഗതം ചെയ്യുന്നതായി ഭാരവാഹികൾ അറിയിച്ചു.
