മനാമ: കെ എം സി സി ബഹ്‌റൈൻ സ്പോർട്സ് വിങ് ആഭിമുഖ്യത്തിൽ ബഹ്‌റൈൻ 50ാം ദേശീയ ദിനാഘോഷ ഭാഗമായി സംഘടിപ്പിക്കുന്ന ഫുട്ബാൾ ടൂർണമെൻറ് ഹൂറയിലെ ഗോസി ഗ്രൗണ്ടിൽ വ്യാഴാഴ്ച ആരംഭിക്കും. സ്വാഗതസംഘം ഭാരവാഹികൾ വാർത്തസമ്മേളനത്തിൽ അറിയിച്ചതാണിത്.
കെ എം സി സി ഫുട്ബാൾ ടീം അടക്കമുള്ള ഒമ്പത് ടീമുകൾ പങ്കെടുക്കുന്ന അഞ്ചാം സീസൺ ടൂർണമെൻറ് രണ്ടുദിവസങ്ങളിലായാണ് നടക്കുക. കുട്ടികളുടെ മാർച്ച്‌ പാസ്‌റ്റോടെ ആരംഭിക്കുന്ന മത്സരം രാത്രി ഒമ്പതിന് തുടങ്ങുമെന്ന് സ്വാഗതസംഘം ചെയർമാൻ ഗഫൂർ കൈപ്പമംഗലം, ജനറൽ കൺവീനർ സാദിഖ് മഠത്തിൽ എന്നിവർ പറഞ്ഞു. എല്ലാ ടീമുകളും പ്രമുഖരായ കളിക്കാരെ നാട്ടിൽനിന്നും മറ്റു ജി സി സി രാജ്യങ്ങളിൽനിന്നും കൊണ്ടുവരുന്നുണ്ട്. ടൂർണമെൻറിന്റെ അവസാനഘട്ട ഒരുക്കങ്ങൾ പുരിഗമിക്കുന്നതായും ഭാരവാഹികൾ പറഞ്ഞു.
