മനാമ: സനാബിസിലെ ദാനമാളിൽ പത്ത് സ്ക്രീനുകളുള്ള പുതിയ ആഡംബര മൾട്ടിപ്ലക്സ് ‘എപിക്സ് സിനിമാസ്’ തുറന്നു. 50 വി.ഐ.പി സീറ്റടക്കം 1100 ൽ അധികം സീറ്റുള്ള തിയറ്ററിൽ വിശാലമായ ലോഞ്ച്, കുട്ടികൾക്ക് കളിക്കാനുള്ള സ്ഥലം തുടങ്ങിയ സൗകര്യങ്ങളും വിശാലമായ പാർക്കിങ് സൗകര്യവുമേർപ്പെടുത്തിയിട്ടുണ്ട്.
ഡോൾബി അറ്റ്‌മോസ് ശബ്ദസംവിധാനം, ക്രിസ്റ്റി റിയൽ ലേസർ 4 കെ പ്രൊജക്ഷൻ എന്നിവയടക്കം ആധുനിക സാങ്കേതിക സൗകര്യങ്ങൾ ആസ്വദിക്കാനുള്ള അവസരമാണ് ചലച്ചിത്ര പ്രേമികൾക്കായി ഒരുക്കിയിരിക്കുന്നത്.
പുതിയ മൾട്ടിപ്ലക്സ് ദാനമാളിന് മികച്ച ആകർഷണമായിരിക്കുമെന്നും ഉപഭോക്താക്കൾക്ക് നവ്യാനുഭവമായിരിക്കുമെന്നും ലുലു ഗ്രൂപ് ഇന്റർനാഷനൽ ഡയറക്ടർ ജുസർ രൂപവാല പറഞ്ഞു.
