മനാമ: വടക്കന് ഗവര്ണറേറ്റിലെ ആലി പ്രോമെനേഡ് വികസന പദ്ധതിയുടെ പ്രവര്ത്തനങ്ങള് വിലയിരുത്തുന്നതിനായി മുന്സിപ്പാലിറ്റി-കൃഷി മന്ത്രി വഈല് ബിന് നാസര് അല് മുബാറക് പ്രദേശം സന്ദര്ശിച്ചു. പദ്ധതിയുടെ വിവിധ ഘട്ടങ്ങളും നടപ്പാക്കുന്ന രീതികളും അദ്ദേഹം നേരിട്ട് കണ്ട് വിലയിരുത്തി.
മുന്സിപ്പല് അഫയേഴ്സ് അണ്ടര് സെക്രട്ടറി ഷെയ്ഖ് മുഹമ്മദ് ബിന് അഹമ്മദ് അല് ഖലീഫ, വടക്കന് ഗവര്ണറേറ്റ് മുന്സിപ്പല് കൗണ്സില് ചെയര്മാന് ഡോ. സയ്യിദ് ഷുബ്ബര് ഇബ്രാഹിം അല്-വദായി, മുന്സിപ്പാലിറ്റി ഡയറക്ടര് ജനറല് മുഹമ്മദ് സാദ് അല് സെഹ്ലി തുടങ്ങിയ പ്രമുഖര് മന്ത്രിക്കൊപ്പമുണ്ടായിരുന്നു.
രാജ്യത്തിന്റെ സമഗ്ര വികസന ലക്ഷ്യങ്ങള് മുന്നിര്ത്തി പാര്ക്കുകള്, പൊതു ഉദ്യാനങ്ങള്, തീരദേശ മേഖലകള്, പ്രോമെനേഡുകള് എന്നിവയുടെ നവീകരണത്തിന് സര്ക്കാര് വലിയ പ്രാധാന്യമാണ് നല്കുന്നതെന്ന് മന്ത്രി പറഞ്ഞു. ‘ആലി പ്രോമെനേഡ് അതിന്റെ തന്ത്രപ്രധാനമായ സ്ഥാനം കൊണ്ട് വടക്കന് ഗവര്ണറേറ്റിലെ സുപ്രധാനമായ ഒരു പദ്ധതിയാണ്. ഈ വര്ഷം രണ്ടാം പകുതിയോടെ ഇതിന്റെ നവീകരണ പ്രവര്ത്തനങ്ങള് പൂര്ണ്ണമായും പൂര്ത്തിയാകും,’ മന്ത്രി വ്യക്തമാക്കി.
സന്ദര്ശകര്ക്കായി അത്യാധുനിക സൗകര്യങ്ങളോടെയുള്ള സംയോജിത അന്തരീക്ഷമാണ് ഇവിടെ ഒരുക്കുന്നത്. പ്രോമെനേഡിലെ പാതകള് ടാര് ചെയ്ത് നവീകരിക്കും, തണല് നല്കുന്ന മേല്ക്കൂരകള്, ശുചിമുറികള് എന്നിവയുടെ അറ്റകുറ്റപ്പണികള് നടത്തും, ലൈറ്റിംഗ് സംവിധാനങ്ങള് മെച്ചപ്പെടുത്തുകയും സുരക്ഷാ ക്യാമറകള് സ്ഥാപിക്കുകയും ചെയ്യും, കുട്ടികള്ക്കുള്ള കളിസ്ഥലങ്ങള് നവീകരിക്കും, കൂടുതല് മരങ്ങളും ചെടികളും വെച്ചുപിടിപ്പിച്ച് പ്രദേശം ഹരിതാഭമാക്കും.
പൊതുജനങ്ങളുടെ കായിക-വിനോദ ആവശ്യങ്ങള് നിറവേറ്റുന്ന സുരക്ഷിതമായ ഒരിടമായി ആലി പ്രോമെനേഡ് മാറുമെന്ന് വടക്കന് ഗവര്ണറേറ്റ് മുന്സിപ്പല് കൗണ്സില് ചെയര്മാന് ഡോ. അല് വദായി പറഞ്ഞു. വ്യായാമത്തിനും വിനോദത്തിനുമായി മികച്ച സൗകര്യങ്ങള് വേണമെന്ന നാട്ടുകാരുടെ ആവശ്യത്തിനുള്ള മറുപടിയാണ് ഈ പദ്ധതിയെന്ന് ആറാം വാര്ഡ് കൗണ്സില് അംഗം അബ്ദുള്ള അബ്ദുല് ഹമീദ് അശൂര് കൂട്ടിച്ചേര്ത്തു.
