മനാമ: തണൽ ബഹ്റൈൻ ചാപ്റ്റർ ഷിഫ അൽ ജസീറ മെഡിക്കൽ സെന്ററുമായി സഹകരിച്ച് നടത്തുന്ന വൃക്കരോഗ നിർണയ മെഡിക്കൽ ക്യാമ്പ് ഓഗസ്റ്റ് 26 വെള്ളിയാഴ്ച നടക്കുമെന്ന് സംഘാടകർ വാർത്തസമ്മേളനത്തിൽ അറിയിച്ചു. ഉച്ചക്ക് ഒരുമണി മുതൽ വൈകീട്ട് ആറ് വരെ സഗയ കെ.സി.എ ഹാളിലാണ് പരിപാടി. വൃക്കരോഗങ്ങളെക്കുറിച്ചും പ്രതിരോധ മാർഗങ്ങളെക്കുറിച്ചും അറിവ് നൽകുന്നതിന് ബോധവത്കരണ ക്ലാസും ഇതോടൊപ്പം സംഘടിപ്പിക്കുന്നുണ്ട്. വിവിധ തരത്തിലുള്ള മെഡിക്കൽ ക്യാമ്പുകൾ ബഹ്റൈനിൽ ധാരാളമായി നടക്കുന്നുണ്ടെങ്കിലും വൃക്ക രോഗ നിർണയത്തിനായി ക്യാമ്പ് സംഘടിപ്പിക്കുന്നത് വിരളമാണ്. ആരോഗ്യകരമായ ജീവിതം ഉറപ്പാക്കാൻ ബഹ്റൈനിലെ പ്രവാസികൾക്ക് ലഭിക്കുന്ന മികച്ച അവസരമാണ് ഇതെന്ന് സംഘാടകർ പറഞ്ഞു.
എന്തെങ്കിലും അസുഖം വന്നാൽ ചികിത്സ തേടുന്നതിൽ മടികാണിക്കുന്നവരാണ് പ്രവാസികളിൽ ഭൂരിഭാഗവും. രോഗം ഗുരുതരമാകാൻ ഇടയാക്കുന്നതും ഈ അലംഭാവമാണെന്ന് ഷിഫ അൽജസീറ മെഡിക്കൽ അഡ്മിനിസ്ട്രേറ്റർ ഡോ. ഷംനാദ് മജീദ് പറഞ്ഞു. തെറ്റായ ജീവിതശൈലി മൂലം പ്രവാസികളിൽ വൃക്കരോഗം പിടിപെടുന്നത് വർധിച്ചിരിക്കുകയാണെന്നും അദ്ദേഹം കൂട്ടിച്ചേർത്തു.
പ്രോട്ടീൻ കൂടുതലുള്ളതും യൂറിക് ആസിഡ് വർധിപ്പിക്കുന്നതുമായ ഭക്ഷണം കഴിക്കുന്നതും അമിത ഭക്ഷണവും ആവശ്യത്തിന് വെള്ളം കുടിക്കാതിരിക്കുന്നതും വൃക്ക രോഗങ്ങളിലേക്ക് നയിക്കുന്ന കാരണങ്ങളാണ്. ആരോഗ്യമുള്ള ഒരു മനുഷ്യൻ ദിവസവും രണ്ട് ലിറ്റർ വെള്ളമെങ്കിലും കുടിക്കണം. വെള്ളത്തിന് പകരം കോളകൾ പോലുള്ള പാനീയങ്ങൾ കുടിക്കുന്ന രീതി പ്രവാസികളിൽ കണ്ടുവരുന്നുണ്ട്. ഇത് ശരീരത്തെ പ്രതികൂലമായി ബാധിക്കുന്ന ജീവിതരീതിയാണ്. കാലുകളിൽ നീര്, ശാരീരികമായ തളർച്ച, ചൊറിച്ചിൽ തുടങ്ങിയവയാണ് വൃക്കരോഗത്തിന്റെ ലക്ഷണങ്ങളെന്നും ഡോ. ഷംനാദ് മജീദ് പറഞ്ഞു.
അഗതി മന്ദിരങ്ങൾ, ഭിന്നശേഷിക്കാർക്കുള്ള വിദ്യാലയങ്ങൾ, തെരുവിലുള്ളവരുടെ പുനരധിവാസം, ഡയാലിസിസ് സെന്ററുകൾ, വൃദ്ധ സദനങ്ങൾ തുടങ്ങിയവയാണ് തണലിന്റെ പ്രധാന പ്രവർത്തന മേഖലകൾ. കേരളം, കർണാടക, തമിഴ്നാട്, പോണ്ടിച്ചേരി എന്നീ സംസ്ഥാനങ്ങളിലായി ഏകദേശം 61 ഡയാലിസിസ് കേന്ദ്രങ്ങളാണ് തണലിന്റെ കീഴിൽ പ്രവർത്തിക്കുന്നത്.
5000ഓളം പേർക്കാണ് ഇതിന്റെ പ്രയോജനം ലഭിക്കുന്നത്. ഗുരുതര വൃക്കരോഗം ബാധിച്ച് ജീവിതം പ്രതിസന്ധിയിലാകുന്നതിൽനിന്ന് ആളുകളെ രക്ഷിക്കുക എന്ന ലക്ഷ്യത്തോടെയാണ് വൃക്ക രോഗ നിർണയ ക്യാമ്പുകൾ നടത്തിവരുന്നതെന്ന് ഭാരവാഹികൾ പറഞ്ഞു. വിശദ വിവരങ്ങൾക്ക് 39603989, 34350088, 38899576 എന്നീ നമ്പറുകളിൽ ബന്ധപ്പെടാവുന്നതാണ്.
വാർത്തസമ്മേളനത്തിൽ തണൽ ബഹ്റൈൻ ചാപ്റ്റർ പ്രസിഡന്റ് റഷീദ് മാഹി, ഷിഫ അൽജസീറ മെഡിക്കൽ ഡയറക്ടർ ഡോ. സൽമാൻ അലി ഗരീബ്, തണൽ ബഹ്റൈൻ ചാപ്റ്റർ ട്രഷറർ നജീബ് കടലായി, വൈസ് പ്രസിഡന്റ് ഇബ്രാഹിം ഹസൻ പുറക്കാട്ടിരി, ജോ. സെക്രട്ടറിമാരായ ലത്തീഫ് കൊയിലാണ്ടി, ഫൈസൽ പാട്ടാണ്ടി, ഷിഫ അൽജസീറ മാർക്കറ്റിങ് മാനേജർ മൂസ അഹ്മദ് എന്നിവരും പങ്കെടുത്തു.