മനാമ: സമൂഹത്തിലെ വിവിധ മേഖലകളിൽ തങ്ങളുടേതായ വ്യക്തിമുദ്ര പതിപ്പിച്ചവർക്ക് ഇന്ത്യൻ സോഷ്യൽ ഫോറം നൽകുന്ന അവാർഡുകൾ പ്രഖ്യാപിച്ചു.
മികച്ച വിദ്യാഭ്യാസ പ്രവർത്തനത്തിനുള്ള അവാർഡിന് ഡോ. മുസ്‌തഫ റസാ റബ്ബാനി (ബിഹാർ) അർഹനായി. ജവാദ് പാഷ (കർണാടക-മികച്ച സാമൂഹിക പ്രവർത്തകൻ), സാബു ചിറമ്മൽ, ഫൈസൽ പറ്റാണ്ടിയിൽ (കേരളം-മികച്ച ജീവകാരുണ്യ പ്രവർത്തനം), അബ്ദുൽ ഖയ്യൂം (തമിഴ്നാട്-മികച്ച എഴുത്തുകാരൻ), ബി.കെ. റിയാസ് (കർണാടക-മികച്ച സംരംഭകൻ) എന്നിവരും പുരസ്കാരങ്ങൾ നേടി. ഇന്ത്യൻ സോഷ്യൽ ഫോറം നടത്തിവരുന്ന സ്വാതന്ത്ര്യദിനാഘോഷങ്ങളുടെ സമാപന ദിവസമായ വെള്ളിയാഴ്ച അൽ ഇസ്‌ലാഹ് ഓഡിറ്റോറിയത്തിൽ പുരസ്‌കാരദാന ചടങ്ങ് നടക്കുമെന്ന് സെൻട്രൽ കമ്മിറ്റി പ്രസിഡന്‍റ് അലി അക്ബർ, ജനറൽ സെക്രട്ടറി റഫീഖ് അബ്ബാസ് എന്നിവർ അറിയിച്ചു.
